Қозғалтқышты бес минуттан артық жылытуға айыппұл қайта қаралады

Қазақстан Парламенті Мәжілісінің депутаттары көлік қозғалтқышын бес минуттан артық жылытуға байланысты айыппұл салу нормасын қайта қарауды талап етті, деп хабарлайды POLITICO.KZ.

Депутат Серік Ерубаевтың айтуынша, әсіресе орталық және солтүстік аймақтарда қатты аяз кезінде қозғалтқышты жылытуға бес минут жеткіліксіз. Мұндай жағдайларда жүргізушілерге қойылатын талаптар әділетсіз.

«Дүкендерге тауар түсіру кезінде қозғалтқышты сөндіру тиімсіз, әсіресе минус 20 градустан төмен температурада. Бұл норманы қайта қарау керек», – деді ол.

«Ақ жол» фракциясының депутаттары бұл норманы климаттық жағдайлар мен аймақтық ерекшеліктерді ескере отырып қайта қарауды және зиянды шығарындыларды азайтудың балама әдістерін қарастыруды ұсынды. Олар бұл ұсыныстарды ҚР Ішкі істер министрлігіне жолдады.

Сонымен қатар, депутаттар әлеуметтік желілерде тараған полиция басшыларының қызметкерлеріне әкімшілік хаттамалар бойынша белгілі бір нормаларды орындау туралы талап қойған дауыстық және бейнежазбаларға байланысты мәселелерді көтерді.

«Әлеуметтік желілерде әрбір РОВД күн сайын 200 айыппұл салуы керек деген тапсырмаларды естідік. Мұндай талаптар заңға қайшы және азаматтардың құқықтарын бұзады», – деп мәлімдеді Ерубаев.

Ішкі істер министрлігі мұндай нормалардың бар екенін жоққа шығарып, нақты фактілер болса, оларды Департаменттің ішкі қауіпсіздік қызметіне хабарлауды сұрады. Дегенмен, министрлік тарапынан нақты түсініктемелер берілмеді.

Еске сала кетейік, қозғалтқышты бес минуттан артық жылыту жол қозғалысы ережелерін бұзу болып саналады. Бірінші рет бұзған жағдайда 5 АЕК (19 660 теңге), ал қайталаған жағдайда 10 АЕК (39 320 теңге) айыппұл қарастырылған.

Ақпарат CMN.KZ сайтынан алынған.