Қызылордада жаңа босанған әйелге қан құйып, ВИЧ жұқтырған

Қызылордада жаңа босанған әйелге қан құйғаннан кейін АИТВ(ВИЧ) инфекциясы анықталды, деп хабарлайды POLITICO.KZ.

Бұл ақпаратты Денсаулық сақтау министрі Ажар Ғиният растады. Ол бұл жағдайды министрлік өз бақылауына алғанын айтты.

"Қазіргі уақытта тиісті тексеру жүргізілуде. Тергеу нәтижелері бойынша тиісті шаралар қабылданады", – деді министр Мәжіліс кулуарында.

Қызылорда облысының полиция департаменті медициналық қызметкерлердің өз міндеттерін дұрыс орындамағаны үшін қылмыстық іс қозғалғанын хабарлады. Аталған бап бойынша 30 тәулікке дейін қамауға алу қарастырылған. Егер зардап шеккен адамның денсаулығына ауыр зиян келтірілсе, жаза екі жылға дейін бас бостандығынан айыруды қамтиды.

Ресми емес деректер бойынша, перинаталды орталықта әйелге 12 донордан қан құйылған. Бір айдан кейін оның ағзасында АИТВ анықталған.