Рүстем Жүгінісов 79 мың теңге айыппұл арқалады

Әнші Рүстем Жүгінісовке 79 мың теңге айыппұл салынды, деп хабарлайды «За нами уже выехали» арнасы.

Танымал әнші Рүстем Жүгінісовке оның даулы пікірлері үшін 79 мың теңгеге жуық айыппұл салынды. Шешімді Астана қаласының мамандандырылған ауданаралық соты шығарды. Сот әншінің екі түрлі мәлімдемесіне қатысты істі қарады.

Ол не үшін жазаланды?

Сот тағайындаған сараптама әншінің сөздері «қоғамда діни алауыздық тудыруы мүмкін» деген қорытындыға келген. Осыған байланысты оны Әкімшілік кодекстің 453-бабы бойынша кінәлі деп таныды.

Дауға себеп болған бірінші оқиға: Жаңа жыл

2023 жылдың 31 желтоқсанында Рүстем Жүгінісов өзінің TikTok парақшасында Жаңа жылды тойлау керек пе деген сұрақ көтерген. Оның айтуынша, бұл мейрамды пайғамбар да, ата-бабамыз да тойламаған.

Екінші оқиға: Мешіттегі жанжал

Біраз уақыт бұрын Ақтөбедегі мешітте бір ер адамның жас қызға бір реттік неке ұсынғаны туралы видео тараған болатын.

Осы оқиғаға қатысты пікір білдірген Рүстем Жүгінісов қыздың өзін кінәлаған. Ол қыздың өзі ер адамды арандатты деп, оған үйде отырып намаз оқығаны дұрыс екенін айтқан. Сондай-ақ, әйелдер мешітке жалғыз емес, әкесімен немесе ағасымен бірге баруы керек деген пікір білдірген.

Сыннан кейінгі кешірім

Әншінің бұл сөздері қоғамда үлкен сынға ұшырады. Осыдан кейін Рүстем Жүгінісов көпшіліктен кешірім сұрап, мешіттегі жағдайға ер адамның кінәлі екенін және өз сөздерінің тым дөрекі болғанын мойындады.

Нәтижесінде сот оны кінәлі деп тауып, мемлекетке 78 640 теңге айыппұл төлеуге міндеттеді.