Сәтбаевтағы қара қардың себебін әкімдік түсіндірді

Сәтбаев қаласының тұрғындары қара қарға шағымдануда. Улытау облысының әкімдігі бұл жағдайға қатысты түсініктеме беріп, мәселенің алдағы уақытта шешілетінін мәлімдеді, деп хабарлайды POLITICO.KZ.

Әкімдік мәліметінше, қаладағы орталық қазандық "Жастар" кенішінен алынған арзан көмірді пайдаланады. Бұл көмірдің бағасы тарифтердің өсуін болдырмауға көмектескенімен, сапасы экологияға және жабдықтардың жұмысына теріс әсерін тигізуде.

– "Жылу энергиясын өндіру үшін пайдаланылатын жабдықтар 1960 жылдары іске қосылған. Олар қазіргі экологиялық стандарттарға сай келмейді. Газ тазалау жүйелері де тозған", – делінген әкімдіктің хабарламасында.

2024 жылы қалада 1,6 миллиард теңгеге жылу беру жүйесін үздіксіз қамтамасыз етуге бағытталған ауқымды жөндеу жұмыстары жүргізілген. Қазіргі таңда қазандық кәсіпорны экологиялық көрсеткіштерді жақсарту үшін және кешенді экологиялық рұқсат алу мақсатында жаңа технологияларды енгізу жұмыстарын қолға алуда.

Сонымен қатар, әкімдік Сәтбаев қаласының барлық жеке тұрғын үйлерін газдандыру жобасы әзірленіп жатқанын айтты.

– "Бұл қазандыққа түсетін жүктемені азайтып, атмосфераға тарайтын зиянды қалдықтардың мөлшерін төмендетуге мүмкіндік береді", – деп қорытындылады әкімдік өкілдері.