Саясаттанушы Ғазиз Әбішев Ұлттық құрылтайда ұсынылған реформаларға баға берді
Саясаттанушы Ғазиз Әбішев Jibek Joly телеарнасына берген сұхбатында Ұлттық құрылтайдың V отырысында Мемлекет басшысы Қасым-Жомарт Тоқаев ұсынған саяси реформаларға қатысты пікірін білдірді, деп хабарлайды Politico.kz.
Сарапшының айтуынша, Президент бастамаларының ішіндегі ең маңызды жаңашылдықтардың бірі – Қазақстанда вице-президент лауазымын енгізу мәселесі. Ғазиз Әбішев Мемлекет басшысының жұмыс жүктемесі өте жоғары екенін атап өтті.
Оның сөзінше, Президенттің шетелдік сапарлары мен ресми кездесулері – атқарылып жатқан жұмыстың тек сыртқы көрінісі ғана. Ал оның артында ауқымды аналитикалық жұмыстар, құжаттарды әзірлеу және стратегиялық шешімдер қабылдау үдерісі жүреді.
«Президенттің бір жарым-екі апта ішінде бірнеше құрлықта болып, күн сайын маңызды іс-шараларға қатысатын кездері бар. Бұл – жұмыстың тек көзге көрінетін бөлігі. Бұған қоса үлкен аналитика, күрделі шешімдер қабылдау процестері бар. Осындай жағдайда Конституциямен бекітілген вице-президент институтын енгізу – орынды әрі қажетті қадам», – деді саясаттанушы.
Ғазиз Әбішевтің пікірінше, вице-президенттің болуы саяси жүйені теңгеріп, Президентке түсетін жүктемені тиімді бөлуге мүмкіндік береді. Бұл президенттік биліктің тұрақтылығы мен тиімділігін арттыра алады.
Сонымен қатар сарапшы Мемлекет басшысының тағы бір бастамасы – Халық кеңесін құру мәселесіне де тоқталды. Аталған органға заң шығару бастамасы құқығы беріліп, Қазақстан халқы Ассамблеясы мен Ұлттық құрылтайдың бірқатар базалық функциялары жүктелмек.
«Азаматтық қоғамды кеңінен қамтитын кеңесші органдар – әлемдік тәжірибеде бар модель. Франция, Канада, Дания секілді елдерде мұндай құрылымдар табысты жұмыс істеп келеді. Олар саяси бәсекеден тыс, еркін қоғамдық диалог алаңын қалыптастырады», – деді Ғазиз Әбішев.
Сарапшы бұл бастамалар Қазақстандағы саяси жаңғыру үдерісін жаңа деңгейге көтеруге бағытталғанын атап өтті.
Соңғы жаңалықтар
