«Шағымын қайтып алды»: Боксшы Теміртас Жүсіповтің жұбайы күйеуін жауапқа тартпауды сұрады
Бокстан әлем және Азия чемпионы Теміртас Жүсіповтің жұбайы күйеуі соққыға жыққанын айтып арызданғаннан кейін, оған қатысно ешқандай шара қолданбауды сұрап, шағымын кері алды, деп хабарлайды Politico.kz.
Ақмола облысы полиция департаментінің мәліметінше, бастапқы арыз негізінде денсаулыққа қасақана зиян келтіру фактісі бойынша қылмыстық іс қозғалған еді. Алайда 7 шілде күні спортшының әйелі күйеуін қылмыстық жауапкершіліктен босатуды сұрап, қарсы өтініш түсірген.
Соған қарамастан, тәртіп сақшылары бұл жағдайға байланысты тергеу амалдарының тоқтамайтынын және істің соңына дейін жеткізілетінін атап өтті.
«Қарсы өтініштің берілуіне қарамастан, отбасылық-тұрмыстық жанжал фактісі бойынша қолданыстағы заңнамаға сәйкес тиісті шаралар қабылданады», – деп хабарлады ведомстводан.
Қазіргі уақытта Теміртас Жүсіповке қатысты арнайы қорғау нұсқамасы шығарылды. Ресми құжатқа сәйкес, спортшыға жұбайының келісімінсіз онымен қандай да бір байланыс орнатуға мүлдем тыйым салынған.
Соңғы жаңалықтар
