Шымкенттегі изоляторда көз жұмған қыздың ісіндегі күдікті қамаудан босатылды

Шымкент қалалық сотының қылмыстық істер жөніндегі апелляциялық алқасы 23 жастағы Сәния Жұбанышеваның өліміне қатысты іс бойынша уақытша ұстау изоляторы кезекшісінің көмекшісі Мұхтар Шамсуддиновті 2 айға қамауға алу туралы қаулының күшін жойды, деп хабарлайды Politico.kz.

Апелляциялық сатыдағы сот күдіктіні күзетпен ұстау түріндегі бұлтартпау шарасын заңсыз деп танып, оны қамаудан босату туралы шешім шығарды. Бұл туралы оның қорғаушысы Талғат Есімов мәлімдеп, тергеу органдарының әрекеті заңға қайшы екенін атап өтті.

Адвокаттың айтуынша тергеушілер оның қорғалушысына онша ауыр емес қылмыстар қатарына жататын салғырттық бабы бойынша айып таққан, ал қылмыстық-процестік заңнамаға сәйкес мұндай жағдайда күдіктіні қамауға алуға мүлдем болмайды және бұған дейін тергеу соты оған кепіл мөлшерін белгілеуден де бас тартқан.

«Ақылға қонымды шешім мен заңдылық меніңше Қылмыстық-процестік кодекс пен Конституция нормаларына қайшы келіп, тергеуге, прокуратураға және тергеу сотына өз шарттарын мәжбүрлеген қоғамдық резонансты жеңіп шықты. Шамсуддинов қамаудан босатылып, жақындарының жанына оралды, ал біздің ендігі жұмысымыз қылмыстық істі толығымен тоқтатуға бағытталады», – деді адвокат Талғат Есімов.

Өз кезегінде қайғылы жағдайда көз жұмған қыздың анасы Зухра Жұбанышева әлеуметтік желі арқылы істі қарап жатқан судьяға үндеу жасап, қызын изоляторға қамау үшін нақты әрі нанымды негіз болмағанын алға тартты. Ол іске қатысы бар мамандардан әрбір процессуалдық шешімнің заңдылығын ашық түсіндіруді сұрап отыр.

«Қызымды уақытша ұстау изоляторына қамау үшін жеткілікті әрі нанымды негіздер болмады деп санаймын. Сол себепті мұндай қатаң шара қолдануға нақты қандай мән-жайлар негіз болғанын түсінгім келеді. Ана ретінде бұл сұрақтарға жауап алуға құқығым бар. Мен ерекше көзқарас сұрамаймын, тек заңдылықты, объективтілік пен әділдікті талап етемін. Қызымның ісі бойынша шешім қабылдаған әрбір адам оның заңдылығы мен негізділігін ашық түсіндіре алады деп үміттенемін», – деді марқұмның анасы Зухра Жұбанышева.

Жәбірленуші тараптың қорғаушысы Мұхаммед Алиосман Оглу бұл істе қоғамдық резонанс үшін ғана адамдарды қамауға алмай, қайғылы оқиғаға кінәлі нақты тұлғаларды анықтау қажеттігін баса айтты.

«Сәния Жұбанышеваның өлімі формалды түрде кінәлілерді іздеуді емес, толық, объективті және бейтарап тергеуді талап ететін қайғы. Қоғам шу шығару үшін жасалатын атышулы ұстауларды емес, оқиғалар желісін толық анықтап, әрекеті немесе әрекетсіздігі қайғылы жағдайға әкеп соққан нақты тұлғаларды жауапқа тартуды күтеді. Сәния үшін әділдік ұсталғандардың санымен емес, әрбір нақты кінәлінің жауапкершілігімен өлшенеді», – деді жәбірленуші отбасының адвокаты Мұхаммед Алиосман Оглу.

Еске салайық, 23 жастағы Сәния Жұбанышева 15 мамыр күні Шымкенттегі уақытша ұстау изоляторынан ауруханаға жеткізіліп, сол жақта көз жұмған болатын. Полицияның алдын ала болжамы бойынша бойжеткен абақтыда отырғанда камераласына тиесілі дәрі-дәрмекті көп мөлшерде ішіп қойған. Ал марқұмның анасы оқиғаға дейін қызын зорламақ болғанын, содан кейін Сәнияны кәмелетке толмаған балаға пышақ жарақатын салды деп айыптап, қамауға алғанын мәлімдеген еді.

Қазіргі таңда құқық қорғау органдары бойжеткеннің өліміне және изолятордағы ұстау режимінің бұзылу ықтималдығына қатысты жан-жақты тергеу жүргізіп жатыр.