Сотталғандарды азаптады деп істі болған 12 түрме қызметкеріне жеңіл айып тағылды

Ақмола облысындағы түрмеде жазасын өтеушіні дәретхана жуудан бас тартқаны үшін сабаған 12 қызметкердің ісінде күтпеген бұрылыс болды. Бұған дейін екі рет алқабилер сотынан ақталып шыққан күдіктілер енді мүлде басқа баппен, жаңа соттың алдында жауап береді, деп хабарлайды Politico.kz.

Жақында Ақмола облыстық сотының алқасы атышулы қылмыстық істі Атбасар аудандық сотына жіберу туралы шешімді күшінде қалдырды. Бұған дейін процесті Қылмыстық істер жөніндегі мамандандырылған сот жүргізіп келген еді.

Сот барысында прокурор айыптау актісін өзгертіп, бұрынғы колония қызметкерлеріне Қылмыстық кодекстің 362-бабы, 1-бөлігі (Билікті немесе лауазымдық өкілеттіктерді асыра пайдалану) бойынша жаңа айып тақты. Бұл сот процесінің форматын түбегейлі өзгертті.

Заңға сәйкес, аталған бап орташа ауырлықтағы қылмыстар қатарына жататындықтан, іс бұдан былай алқабилердің қатысуымен қаралмайды. Ал қылмыс Атбасар қаласындағы түзеу мекемесінде жасалғандықтан, сот процесі де заңдылығы бойынша сол ауданға ауыстырылды.

Естеріңізге сала кетейік, бұл резонансты оқиға 2023 жылы басталған. Ол кезде желіде Атбасар ауданындағы №1 түзеу мекемесінің бір топ қызметкері жазасын өтеушіні аяусыз соққыға жыққан видеосы тарап кетті. Жанжалға сотталушының дәретхана жуудан бас тартуы себеп болғаны айтылды.

Қоғамдық наразылықтан кейін Қылмыстық-атқару жүйесі комитеті (ҚАЖК) қызметтік тексеріс жүргізіп, Ақмола облыстық департаментінің басшысы мен оның орынбасарын, сондай-ақ колония бастығын қызметінен қуған болатын.

Дегенмен, сот процесі айтарлықтай тартысты өтті. 2025 жылдың ақпанында алқабилер соты азаптауға айыпталған 12 қызметкерді кінәсіз деп тауып, ақтап шықты. Прокуратура бұл үкіммен келіспей, шағым түсірген соң іс қайта қаралды.

Алайда, жаңадан құрылған алқабилер тобы да күдіктілерді екінші рет жазадан босатқан еді. Енді міне, прокурор істің бабын ауыстырғаннан кейін, экс-қызметкерлер алқабилердің көмегінсіз нақты үкіммен бетпе-бет келмек.