Танымал актер түрмеден мерзімінен бұрын шығатын болды

Мәскеуде өлімге әкелген жол апатына кінәлі деп танылған ресейлік актер Михаил Ефремовтің мерзімінен бұрын шартты түрде босату (МШБ) туралы өтініші қанағаттандырылды, деп хабарлайды POLITICO.KZ РИА НОВОСТИ арнасына сілтеме жасап.

Белгород облысының Алексеевка аудандық соты актер Михаил Ефремовтің мерзімінен бұрын шартты түрде босату туралы өтінішін қанағаттандырды.

"Сотталған Михаил Олегович Ефремовтің шартты түрде мерзімінен бұрын босату туралы өтініші қанағаттандырылуға жатады", – деді судья Сергей Романенко.

Сот тыңдалымы барысында түзету мекемесінің өкілі Ефремовтің тігін цехында қоймашы және ағаш өңдеу бөлімінде көмекші жұмысшы ретінде жұмыс істегенін, міндеттеріне адалдық танытқанын айтты.

Дегенмен, сот барысында актердің колониядағы тәртіпті бұзғаны анықталды. Мысалы, телефон пайдаланған және "шай ішу үшін" жұмыс орнын тастап кеткен. Бостандыққа қоңырау шалғаны үшін Ефремовті 5 күнге карцерге қамаған.

"Бұл – менің ақымақтығым, жігіттердің телефон соғып жатқанын көріп, мен де бір рет қоңырау шалғым келді. Әлі күнге дейін не үшін жасағанымды түсінбеймін", – деді актер.

Прокурордың айтуынша, қылмыстық жаза мақсатына жеткен, сондықтан Ефремовтің колонияда одан әрі отыруы қажет емес. Бірақ шартты түрде босатылған жағдайда оған үш жыл көлік жүргізуге тыйым салу керек.

Ефремов өз қылмысына өкінетінін, барлық талап бойынша өтемақыны төлегенін айтты.

"Менің басты жауым – алкоголь, сондықтан оны өмірімнен толықтай аластатамын. Сіздерді сендіргім келеді, енді ешкімге зиян келтірмеймін және заң бұзбаймын", – деді Михаил Ефремов.

Еске сала кетсек, 2020 жылдың 8 маусымында Мәскеу орталығында мас күйінде Jeep Grand Cherokee жүргізген Ефремов қос сызықты кесіп өтіп, қарсы жолаққа шығып, "Лада" маркалы фургонға соқтығысқан. Фургон жүргізушісі, интернет-дүкеннің курьері Сергей Захаров ауруханада қайтыс болған.

Дау тудырған сот процесінің нәтижесінде Пресненский соты Ефремовті сегіз жылға жалпы режимдегі колонияға қамауға үкім шығарды. Кейін Мәскеу қалалық соты бұл мерзімді жеті жарым жылға қысқартты.