Трамп ақыл-ой қабілетін бағалайтын тесттен сәтті өткенін мәлімдеді

АҚШ президенті Дональд Трамп жоспарлы медициналық тексеруден кейін өзін жақсы формада сезінетінін және когнитивті (ақыл-ой қабілетін бағалайтын) тесттен сәтті өткенін мәлімдеді, деп хабарлайды POLITICO.KZ РИА Новости сайтына сілтеме жасап.

Бұл туралы ол Ақ үй тілшілеріне берген сұхбатында айтты.

"Мен өзімді жақсы сезініп тұрмын. Жүрегім де мықты, жан-дүнием де өте жақсы. Мен Байденнен сәл өзгеше болғым келді, сол себепті ақыл-ой қабілетіне арналған тест тапсырдым. Барлық сұраққа дұрыс жауап бердім, не дей аламын?" – деді Трамп.

Ақ үйдің мәліметінше, президент шамамен төрт сағатқа созылған жоспарлы медициналық тексеруден өткен. Уолтер Рид атындағы мемлекеттік медициналық орталықтан кейін ол демалыс күндері үшін Флоридаға жол тартты.

Сайлауалды науқан барысында Трамп өзінен бұрын президент болған Джо Байденнің денсаулығына күмән келтіріп, демократтар Байденнің нақты жағдайын жасырып отыр деп бірнеше рет мәлімдеген болатын. Республикандықтар 46-президенттің жиі сүрініп, шатасып, есте сақтау қабілетінде мәселелер бар екенін алға тартып, ол қоғамдық ортада сенімсіз әрекет ететінін атап өткен.

Байден жыл сайын медициналық тексеруден өтіп тұрған. Ақ үй оның дәрігерінің қорытындыларын жариялап, оның толық қабілетті екенін мәлімдеген. Алайда Трамп Байденді когнитивті тест тапсыруға бірнеше рет шақырған. Өз кезегінде Байден бұл сынға нақты жауап бермей, өзінің атқарып жатқан қызметі – оның қабілеттілігінің дәлелі екенін айтумен шектелген.