Трамп Еуропаны америкалық қару сатып алуға міндеттемек

АҚШ президенті Дональд Трамп Еуропа елдерін НАТО қауіпсіздігін күшейту үшін америкалық қару-жарақты сатып алуға шақырды, деп хабарлайды Bloomberg.

АҚШ шенеуніктері бұл мәселені бірнеше рет Еуропадағы әріптестерімен талқылаған. Трамп әкімшілігі АҚШ қаруын сатып алу арқылы Еуропаның әскери жүйесін АҚШ стандарттарына сәйкестендіруді талап етуде.

Кейбір дереккөздердің айтуынша, Трамп еуропалық мемлекеттерге қорғаныс шығындарын ЖІӨ-нің 5%-ына дейін арттыру міндетін жұмсартуы мүмкін, егер олар АҚШ әскери техникасын белсенді сатып алып, инвестиция салса.

Осыған дейін АҚШ-тың қорғаныс министрі Пит Хегсет НАТО-ға мүше елдерге Вашингтонның енді Еуропаның басты қауіпсіздік кепілі болмайтынын мәлімдеген. Бұл мәлімдеме АҚШ-тың трансатлантикалық альянспен дәстүрлі әріптестіктен алыстап, сауда-саттық пен стратегиялық серіктестікке негізделген жаңа саясатқа көшкенін көрсетеді.

Еуропа елдері бұл талапқа күмәнмен қарап отыр. АҚШ қару-жарағына толық тәуелді болу Еуропаның қорғаныс саласын әлсіретіп, қауіпсіздік саясатын Вашингтонға тәуелді етуі мүмкін, дейді сарапшылар.

Bloomberg Economics мәліметінше, Еуропаның қорғаныс жүйесін күшейту мен Украинаны қорғауға алдағы 10 жыл ішінде 3,1 трлн доллар қажет. Бұл қаржы қайда жұмсалатыны, АҚШ қаруына қаншалықты инвестиция салынатыны - алдағы келіссөздер нәтижесінде анықталмақ.