Трамп Путинге Киевпен келісімнен бас тартудың салдары ауыр болатынын ескертті

Украина атысты тоқтату туралы АҚШ ұсынған келісімді қабылдағаннан кейін президент Дональд Трамп Ресей басшысы Владимир Путинге қатаң ескерту жасады, деп хабарлайды POLITICO.KZ.

Сәрсенбі күні журналистердің сұрақтарына жауап берген Трамп егер Ресей уақытша бітім туралы ұсынысты қолдамаса, АҚШ қаржылық қысым көрсетуге дайын екенін жеткізді.

«Қаржылық тұрғыда Ресейге қысым көрсетуге толық мүмкіндігіміз бар. Біз мұны жасағымыз келмейді, бірақ Ресейдің шешіміне байланысты осындай қадамға бара аламыз», – деді Трамп Ақ үйде Ирландия премьер-министрімен өткен баспасөз мәслихатында.

Президент Трамп Ресейге ұсынылған келісімді Путиннің жақын күндері қабылдайтынына сенім білдірді. Оның айтуынша, бұл келісімнің орындалуы екі жақтың да келісіміне тікелей байланысты.

Сондай-ақ Ақ үйдің мәлімдеуінше, АҚШ-тың арнайы өкілі Стив Виткофф Ресей президентімен кездесіп, оған Трамптың ұсынысын жеткізеді. Мемлекеттік хатшы Марко Рубионың сөзінше, Ресей тарапының келісімге деген көзқарасы алдағы жағдайды айқындамақ.

«Ресей оң жауап берсе, бейбітшілік орнатуға жол ашылады. Кері жауап болса, Ресей өзіне үлкен қауіп-қатер алады», – деді Марко Рубио.

Қазіргі уақытта Кремль ресми түрде АҚШ ұсынған келісімге жауап берген жоқ. Бұған дейін сарапшылар Мәскеу нақты кепілдіктерді талап етуі мүмкін екенін мәлімдеген.