Түркістан облысында мектеп жөндеп жатқан әйелдердің видеосының мән-жайы белгілі болды

23 маусым 2026, 15:18 1054

Түркістан облысында мектеп жөндеп жатқан әйелдердің видеосының мән-жайы белгілі болды — Фото: Бейнеден алынған кадр

Түркістан облысы Созақ ауданы Көктөбе ауылындағы мектепте әйелдердің жөндеу жұмыстарын жүргізіп жатқан видеосына қатысты өңірлік білім басқармасы түсініктеме берді, деп хабарлайды Politico.kz.

Әлеуметтік желіде мәжбүрлі еңбек ретінде талқыланған бейнежазбадағы азаматтар мектептің техникалық қызметкерлері болып шықты. Мекеме мәліметінше, олар білім ошағын жаңа оқу жылына дайындау мақсатындағы жоспарлы жазғы жұмыстарға өз міндеттері аясында қатысқан.

"Мектептің техникалық қызметкерлері ұсақ жөндеу, ретке келтіру, тазалық сақтау және абаттандыру жұмыстарына қатысады, оларға ауыр құрылыс жүктелген жоқ", — деді басқарма өкілдері.

Сонымен қатар мектептегі ағымдағы әктеп–сырлау жұмыстарының өзіне бюджеттен арнайы қаржы қаралмаған және мемлекеттік сатып алу рәсімдері де өткізілмеген. Басқарманың сөзіне қарағанда, жазғы кезеңдегі бұл шаралар үшін тек қажетті сыр–бояу мен эмульсия сатып алуға ғана қаражат бөлінген.