Украина Қазақстанға жаңа елшісін тағайындады

Украина президенті Владимир Зеленский Қазақстан Республикасындағы жаңа Төтенше және Өкілетті елші лауазымына Виктор Майконы тағайындады, деп хабарлайды POLITICO.KZ.

Тиісті жарлыққа Зеленский 7 сәуірде қол қойған. Бұл туралы ақпарат Украинаның президенттік сайтына жарияланды.

Виктор Майко бұған дейін Украинаның Түрікменстандағы Төтенше және Өкілетті елшісі қызметін атқарған. Сонымен қатар, Украина сыртқы істер министрінің орынбасары лауазымында болған тәжірибелі дипломат.

Еске салсақ, Украинаның Қазақстандағы елшілігі шамамен екі жыл бойы тұрақты басшысыз жұмыс істеді. Бұрынғы елші Петр Врублевский Қазақстан блогеріне берген сұхбатынан кейін дипломатиялық дау туындап, Қазақстан Сыртқы істер министрлігінің наразылығынан соң қызметінен кері шақырылған болатын.