ҰҚК полковнигі сотталды

Маңғыстауда ҰҚК департаменті басшысының бұрынғы орынбасары 11 жылға сотталды , деп хабарлайды Politico.kz hronika.kz-ке сілтеме жасап.

Маңғыстау облысының қылмыстық істер жөніндегі мамандандырылған ауданаралық соты Ұлттық қауіпсіздік комитетінің өңірлік департаменті басшысының бұрынғы орынбасары Денис Анкудиновке және «Ақтау халықаралық әуежайы» АҚ-ның авиациялық қауіпсіздік сапасы мен бақылау аудиторы Константин Алферовке қатысты үкім шығарды. 

Сот екі айыпталушыны аса ірі көлемде бопсалау фактісі бойынша кінәлі деп таныды. Сонымен қатар Денис Анкудиновке қызметтік өкілеттігін асыра пайдалану айыбы тағылды.

Оқиға қалай өрбіді?

Сот материалдарына сәйкес, 2023 жылдың тамыз айында ҰҚК-нің Маңғыстау облысы бойынша департаменті басшысының орынбасары қызметін атқарған Анкудинов өңірге танымал кәсіпкерден 500 мың АҚШ долларын бопсалау схемасын ұйымдастырған.

Тергеу нұсқасына сай, ол бұл жоспарды іске асыру үшін Константин Алферовті тартқан. Анкудинов қызметтік мүмкіндіктерін пайдалана отырып, кәсіпкер мен оның жақындарының жеке және кәсіби өміріне қатысты мәліметтер жинаған. 2023 жылдың күзінде кәсіпкерге компромат материалдары салынған конверт жіберіліп, артынан 500 мың доллар талап етілген қоңырау түскен.

Сот анықтағандай, фотосуреттердің бірінің артқы бетінде «500 000» деген сома көрсетілген.

Кәсіпкер кездесуге келісіп, алайда бопсалаушыларға 500 мың теңге ғана берген. Ақшаны беру сәтінен кейін күдіктілердің екеуі де ұсталған.

Айыпталушылардың ұстанымы

Сот процесі барысында Денис Анкудинов өз кінәсін мойындамаған. Константин Алферов те дәл осындай ұстаным танытып, айғақ беруден бас тартқан.

Соған қарамастан, сот ұсынылған дәлелдерді үкім шығаруға жеткілікті деп таныды.

Сот үкімі

Сот шешімімен Денис Анкудинов 11 жылға, Константин Алферов 8 жылға сотталды.

Сонымен қатар сотталғандардан жәбірленушінің моральдық зияны үшін 1 миллион теңге, сондай-ақ шамамен 3 миллион теңге сот шығындары өндірілетін болды.