Қырғызстан мен Пәкістан сыртқы істер министрлері Астанада кездеседі

«2024 жылғы 19 мамырда Қырғыз Республикасы Сыртқы істер министрлігінде Қырғыз Республикасы Сыртқы істер министрінің орынбасары Авазбек Атаханов пен Пәкістан Ислам Республикасының Қырғыз Республикасындағы Елшісі Хасан Әли Зайгамның кездесуі өтті. Елші қырғыз тарапына ағымдағы жылдың 18 мамырында Бішкекте шетелдік студенттердің, соның ішінде Пәкістан азаматтарының қатысуымен оқиға туралы ақпарат алуға көрсеткен көмегі үшін алғысын білдірді. А.Атаханов оқиғаның реттелгенін және жағдай Қырғыз Республикасының құқық қорғау органдарының толық бақылауында екенін, барлық қатысы барларға қатысты тергеу жүріп жатқанын атап өтті», - деп хабарлады ведомство.

Тараптар Қырғыз Республикасының Сыртқы істер министрі Жээнбек Құлубаев пен Пәкістан премьер-министрінің орынбасары – Сыртқы істер министрі Мохаммад Исхак Дардың кездесуін 21 мамырда Астанада өтетін ШЫҰ Сыртқы істер министрлері кеңесі аясында ұйымдастыруға келісті. 18 мамырда Бішкекте шетелдіктер қатысқан жаппай төбелес болды. Ол 13 мамырда жатақхана қонақтары арасындағы төбелестен басталған. Кейін Қырғызстан Ұлттық қауіпсіздік мемлекеттік комитетінің төрағасы Камчыбек Ташиев Бішкектегі түнгі оқиғаға қатысты түсініктеме берді. Оқиға салдарынан 29 адам медициналық көмекке жүгінсе, оның 15-і ел астанасының емдеу мекемелеріне жеткізілді. Қырғыз Республикасының Министрлер кабинеті Бішкектегі түнгі оқиғадан кейін мәлімдеме жасап, онда ұлтаралық зорлық-зомбылық пен тәртіпсіздік тудыру әрекеттерін қатаң айыптады. Пәкістан премьер-министрі Шахбаз Шариф Бішкекте шетелдік азаматтарға қатысты оқиғаға алаңдаушылық білдірді. Қазақстан Республикасының Ұлттық қауіпсіздік комитеті Қырғызстаннан Қазақстанға кетуді жоспарлап отырған шетелдік студенттер туралы ақпаратты жоққа шығарды.