Жамбылда полиция басшысының орынбасары пара алды деген күдікпен ұсталды
Жамбыл облысында Байзақ аудандық полиция бөлімінің бастығының орынбасары, полиция подполковнигі Талғат Сәрсенов пара алды деген күдікпен ұсталды, деп хабарлайды Politico.kz.
Бұл туралы “Halyqstan” Telegram арнасы өз қолына түскен мәліметтерге сілтеме жасап хабарлады.
Алдын ала мәлімет бойынша, күдіктіге 300 мың теңге көлемінде ақша берілген. Тергеу нұсқасына сәйкес, бұл қаражат қылмыстық істі рақымшылыққа байланысты тоқтату үшін ұсынылған.
Ақшаны беру дерегі тіркелгеннен кейін аталған факті бойынша Қылмыстық кодекстің 366-бабы 2-бөлігі («Пара алу») бойынша жаңа қылмыстық іс қозғалған.
Мәліметке сәйкес, пара беруге қатысы бар делінген азаматтың өзі де басқа қылмыстық іс бойынша күдікті саналады. Ол Қылмыстық кодекстің 104-бабы 1-бөлігі («Абайсызда адам өліміне әкеп соқтыру») бойынша тергеліп жатыр.
Ал ақша берген адвокаттың қазіргі процессуалдық мәртебесі әзірге белгісіз. Ресми түрде оған қандай да бір айып тағылғаны туралы ақпарат жоқ. Тергеу барысында оның әрекеттеріне құқықтық баға беріліп, қажет болған жағдайда Қылмыстық кодекстің 367-бабы («Пара беру») немесе 368-бабы («Парақорлыққа делдал болу») бойынша саралануы мүмкін.
Қазіргі уақытта құзырлы органдар бұл оқиғаға қатысты ресми түсініктеме берген жоқ. Тергеу амалдары жалғасуда.
Соңғы жаңалықтар
