Жаңа Конституция бойынша референдум бюллетені қандай болатыны белгілі болды

Келесі айдың 15-і күні өтетін жалпыхалықтық дауыс беруге арналған бюллетеньдердің ресми нысаны бекітіліп, оның суреті көпшілікке ұсынылды, деп хабарлайды Politico.kz.

Құжатта сайлаушыларға биылғы 12 ақпанда бұқаралық ақпарат құралдарында жарияланған Қазақстан Республикасының жаңа Конституциясын қабылдау туралы нақты сұрақ қойылған. Дауыс берушілер өздері қолдайтын жауап нұсқасының оң жағындағы бос шаршыға кез келген белгі қоюы қажет. Бюллетеньде азаматтардың таңдауы үшін «Иә, қабылдаймын» және «Жоқ, қабылдамаймын» деген екі нақты жауап қарастырылған.

Орталық сайлау комиссиясы жанындағы Мүгедектігі бар адамдардың сайлау құқықтарын қамтамасыз ету жөніндегі жұмыс тобы көру қабілеті нашар азаматтардың өз бетінше таңдау жасауы үшін Брайль қарпімен жазылған арнайы трафаретті мақұлдады.

Жаңа Ата заң жобасы бойынша жалпыхалықтық референдум 2026 жылдың 15 наурызында өтіп, барлық дауыс беру учаскелері таңғы сағат 07:00-ден кешкі 20:00-ге дейін жұмыс істейді.