Балғынбек Имаш АЭС салуға қарсы пікір білдірді

Белгілі айтыскер ақын Балғынбек Имаш Instagram-дағы парақшасында АЭС салуға қарсылығын білдіріп, билікке ашуланды.

 Оның айтуынша, АЭС-тің салынуы – шешіліп қойған мәселе.

Бірден айтайын, мен маман емеспін. Референдум деп таңдау жасауға мүмкіндік берген соң ақын ретінде емес, осы елдің азаматы ретінде өз сөзімді айтамын. Ештеңе өзгермесе де салынуы шешіліп қойған мәселе. Бұл мәселені «Ресейдің (орыстың емес) бағы, Қазақтың (Қазақстанның емес) соры деп білемін. Неге соры? Біріншіден, бізде таңдау еркі жоқ! Бізге оны тек Ресей салады. Дамыған жапондар емес, тәжірибелі француздар емес, сапасүйер немістер емес. Ақ Патшаның (әлемге жексұрын Пұт-иннің) әлі де боданындамыз. Біздің қожайынымыз, бізді әлі босатқысы жоқ! Жоқ, біз тәуелсізбіз десеңіздер, Кедендік одақтан, ОДКБ-дан шығып көрейік. Жәй бір шығып, таза ауа жұтып, қайта кіреміз десек те шыға алмаймыз, – деп жазды ақын.

Сонымен қатар ол елде мамандардың тапшы екенін де жасырмады.

Бізде білікті маман жоқ! Бар болса да мемлекетке олар керек емес. Олардың пікірі де, білімі де керек емес. Өйткені билік істі өз мамандарына емес, «өз адамдарына» басқартады. Бізде АЭС салу, оны меңгеру, жүргізу түгілі мемлекетті басқаратын кадрлар тапшы. Бізде идеология да, идеолог та жоқ. «Ұлттық Құрылтай» дегенді ойлап тауып, ойына келгендерді мүше қылды. Білікті маман шығаратын есі дұрыс оқу орны да жоқ қой, білім саласындағы жағдай сын көтермейді, – деп ренішін білдірді Балғынбек Имаш.