“+48 градусқа дейін ыстық”: Синоптиктер қазақстандықтарға маңызды ескерту жасады
18 шілде күні Қазақстан аумағында ауа райы құбылмалы болады, деп хабарлайды Politico.kz.
Метеорологтардың мәліметінше, Ақмола, Павлодар, Қарағанды, Шығыс Қазақстан облыстарында, сондай-ақ Абай және Ұлытау облыстарында күндіз ауа температурасы +35…+39 градусқа дейін көтеріледі. Осындай ыстық Ақтөбе, Қостанай, Солтүстік Қазақстан, Алматы және Жетісу облыстарының жекелеген аудандарында да байқалады.
Маңғыстау облысының оңтүстігі мен орталығында +38…+42 градус, ал Қызылорда облысында +40…+44 градусқа дейін ыстық болады.
Ең жоғары температура Жамбыл, Түркістан, Қызылорда, Алматы, Жетісу облыстарында, сондай-ақ Ұлытау, Абай, Шығыс Қазақстан және Қарағанды облыстарының кейбір аудандарында тіркелмек. Бұл өңірлерде сынап бағаны +45…+48 градусқа дейін жетуі ықтимал.
Синоптиктердің болжамынша, атмосфералық фронттардың әсерінен елдің басым бөлігінде жаңбыр жауып, найзағай ойнайды. Шығыс өңірлерде нөсер жаңбыр күтілсе, батыс, солтүстік-батыс, солтүстік және шығыс аймақтарда бұршақ түсіп, дауылды жел соғуы мүмкін. Кей жерлерде шаңды дауыл көтеріліп, солтүстік облыстарда түнгі және таңғы уақытта тұман түсуі ықтимал.
Сонымен қатар, Қызылорда, Түркістан, Жамбыл, Қарағанды, Алматы, Шығыс Қазақстан облыстарында, сондай-ақ Абай, Жетісу және Ұлытау облыстарында жоғары және төтенше өрт қаупі сақталады. Синоптиктер тұрғындарды ауа райының қолайсыз жағдайларына байланысты сақтық шараларын қатаң сақтауға шақырды.
Соңғы жаңалықтар
