Әріптестері аяқтан шалған ба: Данияр Мейірхан туралы адвокаты бар шындықты жайып салды 

Жұмыстан уақытша шеттетілген Есірткі қылмысына қарсы іс-қимыл комитетінің төрағасы Данияр Мейірханның адвокаты Алия Жаманбаева оның ісіне қатысты бірқатар мән-жайды жария етті, деп хабарлайды Politico.kz.

ІІМ Мейрханға қатысты тексеруді оның қарамағындағылардың қызметтік өкілеттігін асыра пайдаланды деп түсірген шағымынан кейін бастаған. Қазіргі уақытта ол қызметтік міндеттерін атқарудан уақытша шеттетілген. Адвокаттың айтуынша, Мейірханға қарсы арыз жазғандар 20 адам емес, небәрі екі қызметкер. Сонымен қатар, оған қызметкер әйелге тиіскен деген айып та тағылған.

«Ең алдымен, әйелге тиіскені туралы айтайық. Арызданушы әйел ұзақ уақыт бойы Есірткі қылмысына қарсы іс-қимыл комитетіне жұмысқа орналасуға ұмтылған. Жұмыс уақытынан тыс ол Мейірханға күн сайын өзі хабарлама жіберіп отырған. Алайда сақталған хат алмасуларға қарағанда, Мейірхан оның ұсыныстарына әрдайым сыпайы әрі қысқа түрде бас тартатынын айтып жауап берген. Бұл әйел 2025 жылдың көктемінде Мейірханның орынбасарының кепілдігімен комитетке жұмысқа қабылданған. Кейін ол кабинет тапшылығына байланысты хатшының орнына ауысуды сұраған. Ол жерде бос орын болғандықтан, Мейірхан оған түсіністікпен қараған», — деп жазды адвокат Instagram парақшасында.

Адвокаттың сөзінше, қызметкер шетелдік делегацияның сапарын ұйымдастыруды дұрыс атқара алмағаннан кейін жұмыс қатынастарында шиеленіс туындаған.

Осыдан кейін бүкіл халықаралық бөлім сынға ұшыраған. Тағы бір жайт: одан кейін оның хатшысы ретінде бірнеше жас қыз жұмыс істеген, бірақ неге екені белгісіз, олардың ешқайсысы өзіне тиіскенін айтып шағымданбаған. 

Екінші жәбірленуші, оның айтуынша, 2024 жылдың күзінде Даниярдың Шымкент қаласындағы танысының өтінішімен комитетке жұмысқа орналасқан. Алайда ол да жүктелген тапсырмаларды орындай алмаған.

«Тоғыз ай бұрын бұл адам өзіне сеніп тапсырылған міндеттерді орындай алмайтынын түсініп, өз еркімен жұмыстан шығу туралы өтініш жазған. Сол кезде ол басшылыққа ешқандай шағымы жоқ екенін көрсеткен. Ал тоғыз айдан кейін не өзгергенін болжау қиын. Дегенмен, қазір бір қызық жайт белгілі болып отыр. Шамамен бір жарым жыл бұрын Данияр шынымен телефон сатып алып беруді өтінген, бірақ өз қаражатына, себебі жұмысының көптігінен өзі бара алмаған. Сол сәтте онымен бірге жұмыс істеген адам оны алдап, қиын жағдайға қалдыруды көздеген. Яғни, ол Мейірханнан ақша алып, телефонды несиеге рәсімдеп, кейін оны асықпай төлеп жүрген, ал басшысына бұл туралы мүлде айтпаған. Негізінде Даниярдың өзіне де, отбасына да телефон сатып алуға мүмкіндігі жеткілікті», — деп толықтырды адвокат.

Адвокаттың пікірінше, оның қорғауындағы адамға тағылған айыптардың «ешбір негізі жоқ».

Данияр Мейірхан кім?

Данияр Мейірхан – полиция полковнигі. 2012-2022 жылдар аралығында Оңтүстік Қазақстан облысы полиция департаментінде бөлім бастығынан бастап басқарма бастығына дейінгі басшылық лауазымдарда қызмет атқарды.

2023 жылдан 2024 жылға дейін ІІМ Қостанай академиясында бөлім бастығынан бастап академия бастығының орынбасарына дейінгі қызметтерді атқарды.

2024 жылдың қыркүйегінен бастап - ІІМ Есірткі қылмысына қарсы іс-қимыл комитеті төрағасының орынбасары.

2024 жылдың желтоқсанынан бастап - Есірткі қылмысына қарсы іс-қимыл комитеті төрағасының міндетін атқарушы.

2025 жылдың қыркүйегінен бастап - ІІМ Есірткі қылмысына қарсы іс-қимыл комитетінің төрағасы.

Істің мән-жайы

Бұған дейін желіде Астанада Есірткі қылмысына қарсы іс-қимыл комитетінің төрағасы Данияр Мейірханға қатысты қылмыстық іс қозғалғаны туралы ақпарат тараған болатын.

Оның үстінен қол астындағы 20 қызметкерден ұжымдық арыз түскені хабарланды.  ІІМ осыған байланысты тексеру бастады.

Данияр Мейірхан қызметтік тексеру кезінде қызметінен шеттетілді.