Бұрынғы министрдің күйеуі Ақтөбеде 60 млрд теңгеге зауыт салмақ

Ақтөбеде 60 миллиард теңгеге шыны ыдыс шығаратын зауыт салынады. Жобаны бұрынғы экология министрі Айткүл Самақованың күйеуі Серік Крымовқа тиесілі компания жүзеге асырады. Бұл туралы National Business Kazakhstan (NBK) басылымы жазды, деп хабарлайды Politico.kz.

Үкімет зауыт құрылысына қатысты инвестициялық келісімді мақұлдады. Жобаны «Aktobe Steklo» ЖШС жүзеге асырады.

Зауыт құрылысы 2026 жылдың төртінші тоқсанында басталады. Кәсіпорынды 2029 жылы іске қосу жоспарланған.

Жаңа зауыт жылына 256 миллион шыны ыдыс шығара алады. Өнімнің шамамен 80 пайызы Қазақстанда сатылып, қалған бөлігі Орталық Азия елдеріне экспортталады.

Қазір Ақтөбе облысында шыны өндіретін кәсіпорын жоқ. Жаңа зауытта 300-ге жуық жұмыс орны ашылады.

Кәсіпорын өндірісте қайта өңделген шыныны да пайдаланбақ. Жобаны қаржыландыру кезеңінде 245 мың тоннадан астам шыны қалдығын өңдеу жоспарланған.

Үкіметтің мәліметінше, зауыттың іске қосылуы отандық азық-түлік және өңдеу өнеркәсібін шыны ыдыспен қамтамасыз етуге көмектеседі.

NBK мәліметінше, «Aktobe Steklo» ЖШС екі жылдан астам уақыт бұрын тіркелген. Осы уақыт ішінде компания бюджетке 20,3 миллион теңге салық төлеген. Оның директоры Темірлан Крымов.

Компания «Aktobe Glass Holding Ltd» жеке компаниясына тиесілі. Ал бұл холдингке Серік Крымов бақылайтын «МАСКАР» ЖШС иелік етеді.

Серік Крымов 1990 жылдан 2011 жылға дейін Қазақстан Компартиясы Орталық комитетінің демалыс үйін басқарған. Кейін бұл нысан «Алмалы» қонақүй кешені болып өзгертілген.

Қазір оның Атыраудағы бизнес орталыққа иелік ететін «Жайық Инвест Девелопмент» ЖШС мен Ақтаудағы қонақүй кешенін бақылайтын «Торал Каспий» ЖШС компанияларында үлесі бар. Ол көлік, логистика және мейрамхана бизнесіне де қатысады.

Серік Крымовтың жұбайы Айткүл Самақова 2002 жылдан 2006 жылға дейін Қазақстанның қоршаған ортаны қорғау министрі болған. Бұған дейін өнеркәсіп және сауда вице-министрі қызметін атқарған.

Самақова Президент жанындағы Отбасы істері жөніндегі ұлттық комиссияны да басқарған. Ол Сенат пен Мәжіліс депутаты болған.