Chevron компаниясы жаңа жылдан бастап басшылық құрамын өзгертпекші: Имер Боннер жоғары қызмет алды

2018-2021 жылдары Қазақстандағы «Теңізшевройлды» басқарған Имер Боннер Chevron корпорациясының бүкіл мұнай, мұнай өнімдері және газ бизнесінің президенті болады. Компания 5 қазанда жариялаған өзгерістер 2027 жылғы 1 қаңтардан күшіне енеді, деп хабарлайды Politico.kz.

Қазір Боннер корпорацияның қаржы директоры болып отыр. Бұған дейін ол 2018–2021 жылдар аралығында «Теңізшевройлдың» бас директоры, кейін 2021–2024 жылдары Chevron технологиялық орталығының президенті әрі бас технологиялық директоры қызметтерін атқарған

Жаңа қызметінде Боннер өндірістен өнім өткізуге дейінгі жұмыстың қауіпсіздігі мен тұрақтылығына, инвестицияны тиімді бөлуге және активтердің нәтижесін жақсартуға жауап береді.

Оның орнына жаңа энергетика бағытының қазіргі президенті Джефф Густавсон қаржы директоры болады. Ол аудит, қаржылық есеп пен бақылау, инвесторлармен байланыс, салық, қазынашылық және бизнес-жоспарлау жұмысын басқарады.

Марк Нельсон вице-төраға қызметін сақтап, мұнай-газ бағытының атқарушы вице-президенті міндетінен стратегия мен бизнесті дамытуға ауысады. Ол компанияның активтерін нығайтуға, бәсекеге қабілетін арттыруға және ұзақ мерзімді өсуіне мүмкіндік іздейді.

Теңіздегі жобаларды басқарып отырған Брент Грос жаңа энергетика бағытына жетекшілік етеді. Оның қарауына сутегі, электр энергиясы, көміртекті ұстау, шығарындыларды өтеу және биоотын жобалары кіреді. Сонымен қатар ол жасанды интеллектіні жұмысты жақсарту, шығынды азайту және жаңа шешімдер енгізу үшін қолдану стратегиясын қадағалайды.

Chevron басшысы Майк Уирт бұл 4 басшының тәжірибесі мен стратегиялық көзқарасы компанияның өзгеріп жатқан энергетика нарығындағы жұмысына көмектесетінін айтты.

Еске сала кетейік, Chevron-ның «Теңізшевройлдағы» үлесі 50 пайыз, ал Қарашығанақ жобасындағы үлесі 18 пайыз. Сондықтан Боннердің бұрынғы жұмыс тәжірибесі компанияның Қазақстандағы ірі активтерімен тікелей байланысты.