Екатерина Бивол Қазақстанның іздеу тақтасына ілінді

Ресейлік боксшы Дмитрий Биволдың бұрынғы жұбайы Екатерина Биволға Қазақстан аумағында іздеу жарияланды. Ол бұған дейін түрлі ұлт өкілдерін, соның ішінде қазақтар мен қырғыздарды қорлайтын бейнежазба жариялап, қылмыстық іс фигуранты атанған еді, деп хабарлайды POLITICO.KZ.

Екатерина Игоревна Биволдың деректері Құқықтық статистика және арнайы есепке алу органдарының ресми порталындағы іздеу тақтасында пайда болды.

Іздеуге Қазақстан Республикасының Ішкі істер министрлігі бастамашы болған. Нақтырақ айтсақ, іздестіру шараларын Астана қаласы Полиция департаментіне қарасты «Байқоңыр» ауданының Полиция басқармасы жүргізуде.

Мәліметтерге сәйкес, іздеу осы жылдың 1 қарашасында жарияланған. Тіркелген өңір ретінде Астана қаласы көрсетілген.

Бұған дейін Қырғызстан да Екатерина Биволға қатысты сырттай қамауға алу туралы қаулы шығарғаны белгілі.