Елімізде 2 мыңнан астам мұғалімнің жеке дерегі тарап кетті

Павлодарда 2 мыңнан астам білім беру қызметкерінің деректері тарап кеткен, деп хабарлайды Politico.kz.

Мектеп әкімшілігі деректерді медициналық тексерулерге қатысты құжаттармен бірге мемлекеттік сатып алу порталына өздері жүктеп жіберген. 

Ведомство мәліметінше, 28 білім беру ұйымының құжаттарынан қызметкерлердің жеке деректері анықталған. Олардың қатарында анкеталық мәліметтер, тұрғылықты мекенжайлар және байланыс телефон нөмірлері болған.

«Мұндай ақпараттың жария болуы еңбек заңнамасының нормаларын бұзады және оны алаяқтық мақсатта пайдалану қаупін тудырады», – деп атап өтті прокурор.

Нәтижесінде прокуратураның қадағалау шаралары бойынша Павлодарда білім беру саласының 2 065 қызметкерінің жеке деректері ашық деректен жойылды.

Сонымен қатар кінәлі лауазымды тұлғалар тәртіптік жауапкершілікке тартылды.