Қазақстандықтардың 85%-дан астамы Президенттің армияны реформалау туралы шешімін қолдайды

Әскерде қандай өзгеріс қажет деген сұраққа сауалнама қатысушылары ең жиі Қорғаныс министрлігінің ашықтығы мен есептілігін арттыруды атаған. Командирлердің кәсіби деңгейі мен жемқорлыққа қарсы күрес те көпшілік таңдаған жауаптардың қатарында, деп хабарлайды Politico.kz.

Бұл туралы 28 және 29 қыркүйекте зерттеу жүргізген «Демократия институты» ғылыми-зерттеу қауымдастығы хабарлады. Оның мәліметінше, қатысушылардың 85,2%-ы Президент Қасым-Жомарт Тоқаевтың Қорғаныс министрлігін жан-жақты тексеру туралы шешімін толық немесе ішінара қолдаған. Ал армияны реформалау шешімін 85,7%-ы оң бағалаған.

Қажетті өзгерістер туралы сұрақта бірнеше жауап таңдауға мүмкіндік берілген. Нәтижесі мынадай:

• министрліктің ашықтығы мен есептілігін арттыру: 47,4%;
• командалық құрамды жаңартып, кәсіби деңгейін көтеру: 34,3%;
• қорғаныс саласындағы жемқорлықпен күресті күшейту: 29,4%;
• әскери қызметшілердің қауіпсіздігі мен әлеуметтік жағдайын жақсарту: 25,3%;
• қару-жарақ пен әскери техниканы жаңарту: 20,7%;
• жаңа технологиялар мен цифрлық шешімдерді енгізу: 20,4%;
• жауынгерлік даярлық пен оқу-жаттығу сапасын көтеру: 19,2%.

Зерттеу 2026 жылғы 28 және 29 қыркүйекте CAWI әдісімен, яғни онлайн сауалнама арқылы жүргізілген. Оған 17 облыстан және Астана, Алматы, Шымкент қалаларынан 18 жастан асқан 1012 адам қатысқан. Көрсетілген пайыздар осы қатысушылардың жауабын білдіреді.

Еске салсақ, Маңғыстау облысындағы оқу-жаттығуда 14 әскери қызметші қаза тапқаннан кейін, Президент 27 қыркүйекте Қорғаныс министрлігінің басшылық құрамымен арнайы кеңес өткізді. Ол министрлікті жан-жақты тексеріп, 10 күн ішінде әскери реформаның кезеңдері нақты көрсетілген жоспарын әзірлеуді тапсырды.