Киев Астанаға «достық емес ұстанымда» – саясаттанушы

Каспий құбыр консорциумы (КТК) инфрақұрылымына жасалған шабуылдан кейін Қазақстан мен Украина арасындағы қарым-қатынастағы шиеленіс күшейді. Бұл жөнінде саясаттанушы Данияр Ашимбаев пікір білдірді, деп хабарлайды POLITICO.KZ.

Сарапшының айтуынша, болған оқиға екі ел арасындағы проблеманың жүйелі сипатын көрсетеді. Ол Киевтің Астанаға қатысты ұстанымы соңғы жылдары серіктестік шегінен шығып кеткенін айтады.

Ашимбаев Украина тәуелсіздік алғаннан бері саяси бағытын Қазақстаннан мүлде бөлек арнада жүргізіп келгенін атап өтті.

Оның айтуынша, Қазақстан тұрақтылыққа, этноконфессионалдық келісімге және радикализмге жол бермеуге басымдық берсе, Украина ішкі дағдарыстарды күшейтіп, олигархиялық ықпалды арттырып алған.

Саясаттанушы Киевтің сыртқы күштердің мүддесіне тәуелді болып қалғанын да алға тартады.

Ашимбаев сонымен қатар Қазақстанның Украинадағы қақтығыс басталғалы бейтарап саясат ұстанып, Мәскеумен де, Киевпен де байланысын үзбей келгенін еске салды. Астана бітімгерлік бастамаларды қолдап, Қытай мен АҚШ-тың реттеу жоспарларын да құптаған.

Оның пікірінше, Киев бұл ұстанымды өзіне қарсы қадам ретінде қабылдап отыр.

«Украина Қазақстанға қатысты өзін қас мемлекет ретінде көрсетіп келеді», – деді сарапшы.

Ашимбаевтың ойынша, ақпараттық шабуылдардан бөлек, Киев КТК нысандарына жасалған бірнеше бағытталған шабуылға да жауапты болуы мүмкін.