Мемлекеттің 4 млрд теңгесін жымқырған күдікті Грузиядан экстрадицияланды
Бас прокуратура мен Қаржылық мониторинг агенттігі «Транстелеком» АҚ арқылы мемлекетке 4 млрд теңгеден астам шығын келтірген күдіктіні Грузиядан Қазақстанға қайтарды, деп хабарлайды Politico.kz.
Тергеу мәліметтеріне сүйенсек, аталған тұлға компания басшысы қызметінде жүріп, өзге адамдармен алдын ала сөз байласқан. Олар мемлекеттік сатып алу талаптарын айналып өтіп, қаражатты жымқыру мақсатында спутниктік және телекоммуникациялық жабдықтарды жалға алу туралы заңсыз шарт жасасқан. Осы қылмыстық әрекеттің салдарынан мемлекетке 4 миллион емес, 4 млрд теңгеден астам орасан зор шығын келген.
Қылмысы әшкере болған соң шетелге қашып кеткен күдіктіге халықаралық іздеу жарияланған. Нәтижесінде ол биыл наурыз айында Грузия аумағында қолға түсіп, Қазақстанның сол елдегі елшілігінің қолдауымен Бас прокуратураның сұрауы бойынша елге экстрадицияланды.
Қазіргі уақытта ұсталған азамат тергеу изоляторына қамалды. Қолданыстағы қылмыстық заңнамаға сәйкес, бұл әрекеті үшін оның мүлкі тәркіленіп, өзі 12 жылға дейін бас бостандығынан айырылуы мүмкін.
Соңғы жаңалықтар
