Мешіттегі қанды қылмыс: ұйықтап жатқан азаматты 30 рет пышақтап өлтірді

Әзербайжан астанасында орналасқан мешітте адам шошырлық кісі өлтіру дерегі тіркелді. Қылмыс Сурахан ауданына қарасты Бюльбюля елді мекеніндегі Имам Мұхаммед Садық Имамзада мешітінде орын алған. Бұл туралы Xəzər TV мәлімдеді.

Алдын ала мәліметке сәйкес, 1990 жылы туған Надир Сафаров намаз оқығаннан кейін мешіттегі тынығу бөлмесінде демалып жатқан. Осы сәтте белгісіз адам оған пышақпен шабуыл жасап, шамамен 30 рет пышақтаған.

Қанды оқиғаға күдікті ретінде 1996 жылы дүниеге келген Эльвин Мамедов ұсталды. Белгілі болғандай, ол 44 күнге созылған Отан соғысының (Таулы Қарабақ соғысы) қатысушысы.

Қазіргі уақытта оқиғаға байланысты тергеу амалдары жүргізіліп жатыр. Билік өкілдері кісі өлтірудің себептерін анықтап, оқиғаның мән-жайын егжей-тегжейлі зерттеуде.