Мұғалімдерді артық есептен құтқаратын заң әзірленді

Мәжіліс депутаты Асхат Аймағамбетов педагогтердің артық жүктемесін азайтуға бағытталған заң жобасы әзірленгенін мәлімдеді. Оның айтуынша, ұстаздарды кәсіби қызметіне қатысы жоқ тапсырмалардан қорғау – білім сапасын арттырудың маңызды шарты, деп хабарлайды Politico.kz.

Депутаттың сөзінше, кейбір мектептерде мұғалімдерді рилс түсіруге мәжбүрлеу, жұмыс уақытынан тыс, тіпті түнгі мезгілде WhatsApp арқылы жауап беруге міндеттеу, сондай-ақ есепті электронды және қағаз форматта қатар тапсыру секілді артық талаптар әлі де кездеседі.

Жаңа заң жобасы дәл осындай негізсіз жүктемелерді қысқартуды көздейді.

«Бұл – өте маңызды мәселе. Ұстаздар артық міндетпен емес, сапалы білім мен саналы тәрбиемен айналысуы тиіс», – деді Асхат Аймағамбетов.

Оның мәліметінше, заң жобасы жұмысқа қабылданып, келесі аптадан бастап жұмыс тобының талқылауына шығарылады. Құжат талқылау барысында жан-жақты қарастырылып, тиісті ұсыныстар енгізілмек.