“Қазақ мәдениетсіз”: Желідеге жазба дау тудырды

Әлеуметтік желіде Гүлжазира Есболдың көлемді әрі эмоцияға толы жазбасы қызу пікірталас тудырып жатыр, деп хабарлайды POLITICO.KZ.

Автор қазақтардың күнделікті өмірдегі тұрмыс мәдениеті мен қоғамдық тәртіпті сақтамауына байланысты өз ренішін ашық жеткізіп, нақты мысалдар келтірген.

Жазбаның мазмұны қоғамда жиі кездесетін келеңсіз көріністерді қамтиды. Автордың айтуынша, қоқысты кез келген жерге тастау, подъезд пен ауланы ластау, темекі қалдықтарын лақтыру, дәретхананы таза ұстамау, жолда бір-біріне жол бермеу, түнгі уақытта айғайлап жүру, музыка қосудан басталатын қарапайым мәдениетсіздік күнделікті өмірде қалыпты құбылысқа айналған.

Гүлжазираның жазбасында жүргізушілердің жол ережесін елемеуі, аварийка мен поворотникті қолданбауы, қызыл жарыққа өтіп кетуі, бір-бірін сыйламауы да сынға алынады. Автор мұны тек тәртіпсіздік емес, қауіпті әрекет деп бағалайды.

Сонымен бірге жазбада көршілердің подъездді жеке қоймаға айналдыруы, коляска, велосипед, құрылыс қалдықтарын ортақ дәлізге қоюы, балалардың қоқысты жолай тастай салуы және оған ата-ананың ескерту жасамауы секілді мәселелер де қозғалған.

Мәтіндегі ең позитивті тұс – автордың көше сыпырушыларға ризашылығы. Ол бұл жандардың еңбегінің ауырлығын атап өтіп, кейде оларға алғыс ретінде ақша беретінін, адамдардың тәртіпсіздігі үшін кешірім сұрайтынын жазған.

«Маған ұлттың, діннің, нәсілдің, лауазымның қажеті жоқ. Маңыздысы – адамдық, тәрбие және мәдениет», – дейді Гүлжазира.

Оның жазбасы әлеуметтік желі қолданушыларын екіге бөлді: бір бөлігі автордың сынымен толық келіссе, екінші бөлігі ондай жалпылаудың дұрыс еместігін айтқан.

Қалай болғанда да, бұл жазба қазақстандық қоғамдағы мәдениет, тәртіп, қоғамдық жауапкершілік мәселесін қайта күн тәртібіне шығарды.