Қазақмыс Жезқазған зауытындағы салқындатқыш мұнараны жөндеуге 921,8 млн теңге бөлді

Қазақмыс Жезқазған мыс балқыту зауытында (ЖМЗ) пайдалануға жарамсыз деп танылған №1 салқындатқыш мұнараны қалпына келтіруге кірісті, деп хабарлайды Politico.kz.

Компанияның хабарламасына сәйкес, үш секциялы желдеткішті мұнараны күрделі жөндеу жобасының құны 921,8 млн теңгені құрайды.

1971 жылы іске қосылған мұнара күкірт қышқылы цехының негізгі жабдықтарына қажет технологиялық суды салқындатады. Алайда 2021 жылы өнеркәсіптік қауіпсіздік сараптамасы нысанды пайдалануға жарамсыз деп таныған. Ал 2024 жылы құрылыс және металл құрылымдарының бір бөлігі құлағаннан кейін оған кіруге тыйым салынған.

2026 жылы Қазақмыстың жаңа басқарушы командасы мұнараны толық қалпына келтіру туралы шешім қабылдады. Компания бұл жұмыс салқындату жүйесінің сенімділігін арттырып, күкірт қышқылы өндірісіндегі ақау қаупін азайтады деп күтеді.

Қазір тозған және зақымдалған құрылымдарды бөлшектеу аяқталуға жақын, аумақ толық тазартылған. Мамандар мұнара бассейнінің бетон негізін нығайтып, жарықтарын жөндеген, енді су өткізбеуге арналған оқшаулау жұмыстарын жүргізіп жатыр.

Келесі кезеңде жаңа тірек қаңқасы, заманауи тамшылы бүріккіштер, су ұстағыш және желдеткіш қондырғы орнатылады. Металл құрылымдар тот басудан қорғайтын құраммен өңделеді. Жөндеуді 150 күнтізбелік күн ішінде аяқтау жоспарланған.

Мұнара қайта іске қосылғанда күкірт қышқылы өндірісін салқындатылған сумен қамтамасыз етеді. Жоба Қазақмыстың жаңа басқарушы командасы 2026 жылы жүзеге асырып жатқан өндірістік инфрақұрылымды жаңарту бағдарламасына кіреді. Компания бағдарламаның мақсаты нысандардың сенімділігін арттырып, өндірістегі қауіптерді азайту және еңбек жағдайын қауіпсіз ету екенін хабарлады.