«Қазақстан темір жолына» жаңа басшы тағайындалды

"Қазақстан темір жолы" ұлттық компаниясы басқарма төрағасының міндетін атқарушы болып Бауыржан Орынбасаров тағайындалды, деп хабарлайды Politico.kz.

Ол бұл лауазымда күні бүгін қызметінен босатылған Талғат Алдыбергеновті алмастырды.

Қызылорда облысының 55 жастағы тумасы теміржол саласында 1993 жылдан бері үзіліссіз еңбек етіп келеді. Осы жаңа тағайындауға дейін ол ұлттық компания басқарма төрағасының орынбасары әрі өндірістік процестер жөніндегі басқарушы директор міндетін атқарды.

Бауыржан Орынбасаровтың еңбек жолы Батыс Қазақстан теміржолында басталған. Отыз жылдан астам уақыт ішінде ол қарапайым диспетчерден бастап, ірі құрылымдық бөлімшелердің жетекшісіне дейінгі жолдан өтті. Түрлі жылдары Қарағанды және Алматы бөлімшелерін, тасымалдау процесі дирекциясын, магистральдық желіні басқарды.

Сонымен қатар ол "Қазтеміртранс" компаниясының төраға міндетін атқарушы болды және "ҚТЖ" құрылымында бас инженер, түрлі бағыттар бойынша вице-президент қызметтерін атқарған. Тұтастай алғанда, жаңа басшы компанияның бүкіл өндірістік және инфрақұрылымдық процестерімен іштей таныс тәжірибелі маман саналады.