Қазақстанда жүргізушілер үшін 0,3 промилле шекті нормасын енгізу жоспарланып отыр

Қазақстанда жүргізушілерді алкогольдік мас болу тұрғысынан медициналық куәландыру ережелеріне ресми түрде 0,3 промилле шекті көрсеткішін енгізу қарастырылуда, деп хабарлайды Politico.kz.

Денсаулық сақтау министрлігінің түсіндіруінше, нақты шекті мөлшерді белгілеу шынайы мас болу жағдайын аспаптардың қателігінен немесе ағзадағы табиғи процестерден ажырату үшін қажет.

Негізгі реттеу шарттары:

0,3 промилле және одан жоғары көрсеткіш тіркелсе, бұл алкоголь тұтыну фактісі болып есептеледі. 0,3 промилледен төмен көрсеткіш ағзадағы зат алмасу процестерінің өнімі (эндогендік алкоголь) немесе кейбір тамақ өнімдерін тұтыну салдары ретінде бағаланады. 

Алкотестердің көрсеткіші жалғыз критерий болмайды. Дәрігерлер жүргізушінің жағдайын кешенді түрде бағалауды жалғастырады (сөйлеу мәнері, бет әлпеті, қарашық реакциясы, қозғалыс координациясы және қажет болған жағдайда зертханалық сараптамалар). 

Қазіргі уақытта құжат қоғамдық талқылау кезеңінен өтіп, мүдделі мемлекеттік органдармен келісуге дайындалуда. Ресми бекіту процесі ағымдағы жылдың соңында немесе 2027 жылдың басында аяқталуы мүмкін.

Денсаулық сақтау министрлігі бұйрық ресми түрде қабылданғанға дейін 0,3 промилле нормасы күшіне енбейтінін ескертеді. Әзірленіп жатқан өзгерістер куәландырудың техникалық реттелуі болып табылады және рөлге ішімдік ішіп отыруға рұқсат бермейді.