Қазақстанның бірнеше өңірінде Telegram желісі істен шықты

13 тамыз күні таңертең Қазақстанның бірнеше аймағында Telegram мессенджерінің жұмысында іркіліс тіркелді, деп хабарлайды Politico.kz.

Detector404.kz сервисіне сүйенсек, пайдаланушылардың шағымы сағат 11:25 шамасында күрт көбейген. Тұрғындардың хабарламалары жіберілмей, медиафайлдар жүктелмей қалды. Оған қоса желіге қосылу да қиындаған.

Ақау туралы арыздар негізінен Астана қаласынан түсті. Сондай-ақ Қарағанды, Павлодар, Батыс Қазақстан және Солтүстік Қазақстан облыстарының тұрғындары белсенді шағымданған.

Шағымдардың 53,5%-ын iOS жүйесіндегі құрылғыларды пайдаланушылар жіберген. Олар негізінен хабарландырулар мен мобильді қосымшаның жұмысына наразылық білдірді.

Қазіргі уақытта бұл ақаудың нақты себебі белгісіз. Telegram компаниясының өкілдері жағдайға қатысты әлі ресми пікір білдірген жоқ.