ШҚО дәрігерлері 700 грамм болып туған нәрестенің өмірін сақтап қалды

Шығыс Қазақстан облысында дәрігерлер салмағы небәрі 700 грамм болып туған нәрестенің өмірін сақтап қалды, деп хабарлайды yk-news.kz. «Саша есімді нәресте Риддердегі Владимир мен Анастасия Богдаевтардың отбасында дүниеге келген. Бұл олардың үшінші баласы. Саша жүктіліктің 25-аптасында, яғни мерзімінен бұрын дүниеге келген. Оның салмағы 740 грамм болды», — деп жазады басылым. Дәрігерлер нәрестенің өмірін сақтап қалу үшін оны Өскеменге көшіруді жөн көрді. Жаңа туған нәрестені облыс орталығына жеткізу үшін «Қазмырыш» компаниясы вертолетпен көмек көрсетті. «Алғашқы күндері Саша Өскемендегі Ана мен бала орталығының реанимация бөлімінде болды. Дәрігерлер нәрестенің өмірі үшін күресіп, жасанды тыныс алу аппараты мен арнайы инкубатордың көмегімен қажетті температура мен ылғалдылықты қамтамасыз етті. Нәрестенің жағдайы жақсара бастағаннан кейін, ол анасымен бірге палатаға ауыстырылды», — деп жазылған материалда. Анастасия ұлы Сашамен бірге ауруханада үш айдан астам уақыт өткізді. Қараша айының басында анасы мен нәресте үйлеріне оралды. Қазіргі таңда Сашаның салмағы 3,5 келі, ал бойы 50 сантиметр. Оның денсаулығын мамандар үнемі бақылауда ұстап отыр.