"Қазақ тілі неге үшінші тұр?": Ticketon сайты тағы да сынның астында қалды

Ticketon сайтының қазақша нұсқасынан орысша сөздер шықты, деп хабарлайды POLITICO.KZ порталы.

Freedom банкіне тиесілі Ticketon билет сату сайтының қазақша нұсқасында кейбір бөліктердің орыс тілінен аударылмағаны анықталды. Бұл кемшілікті алғаш болып Threads әлеуметтік желісінде yernarsalim есімді қолданушы байқап, жариялаған.

«@ticketonkz мынаған не дейсің ал? Тіл қазақша таңдалған, «загружаем схему» деген қалай кетті, «ряд» деген «қатар» болады білмесеңдер, сосын ҚАЗАҚ ТІЛІ ticketon.kz сайтында неге үшінші тұр?», — деп жазды ол.

Редакциямыз бұл ақпаратты тексеру үшін сайтқа кіріп, айтылған қателіктердің расымен бар екеніне көз жеткізді. Қазақ тілі таңдаулы тұрса да, орындықтардың сұлбасын жүктеу кезінде «загружаем схему» деген орысша жазу шығады.

Оған қоса, шараның өтетін орны мен уақыты, сондай-ақ «18 жасқа толмағандарға ата-анасымен немесе қамқоршысымен кіру керек» деген сияқты ескертпелер де толықтай орыс тілінде жазылған. Тіпті, залдың сұлбасындағы «сцена», «партер» сияқты сөздер де аударылмаған.

Еске сала кетейік, бұл дәл осы сайтқа қатысты мемлекеттік тілге байланысты бірінші мәселе емес. Осыған дейін аты-жөнінде қазақ әріптері бар жанкүйерлер «Қайрат» пен «Реал Мадрид» арасындағы тарихи ойынға билет ала алмай шулаған болатын. Олардың деректерін жүйе қабылдамай, «аты-жөніңізді толтырыңыз» деген қате шығарып отырған. Ал егер есімдерін орыс әріптерімен жазса, ешқандай кедергі болмаған.