Тегеран Иранның жоғарғы көшбасшысы Моджтаба Хаменеи туралы мәлімдеме жасады

Тегеран Иранның жоғарғы көшбасшысы Моджтаба Хаменеи туралы ресми мәлімдеме жасады. Онда оның жағдайы жақсы екені және елдің мемлекеттік жүйесі тиімді жұмыс істеп жатқаны айтылған, деп хабарлайды Politico.kz.

Бұл туралы Иран Сыртқы істер министрлігінің өкілі Исмаил Багаи India Today телеарнасына берген сұхбатында мәлімдеді. Оның сөзінше, жоғарғы көшбасшы өзін жақсы сезінеді, ал елдің қарулы күштері қорғаныс жоспарларына сәйкес әрекет етуде. Сонымен қатар ол халықтың қазіргі жағдайға қарамастан бірлік танытып отырғанын атап өтті.

Осы оқиғалар аясында аймақтағы әскери шиеленіс күшейіп отыр. 28 ақпанда Израильдің қорғаныс министрі Исраэль Кац ел армиясы Иранға қарсы алдын ала соққы жасағанын хабарлады. Шабуыл барысында Иранның ірі қалалары, соның ішінде Тегеран да зардап шеккен. Әскери операция «Арыстанның ақырғаны» деп аталған. Осыдан кейін екі ел де өз әуе кеңістігін жапты.

Кейін АҚШ президенті Дональд Трамп Америка Құрама Штаттары да Иранға қарсы әскери операцияға қатысып жатқанын мәлімдеді. Пентагон бұл операцияны «Эпикалық ашу» деп атаған. Ақ үй бұл әрекеттерді Иран тарапынан туындауы мүмкін зымырандық және ядролық қауіппен байланыстырды.

Өз кезегінде Иран Израильге ондаған баллистикалық зымыран ұшырған. Сондай-ақ Таяу Шығыстағы АҚШ әскери базаларына, соның ішінде Катар, Біріккен Араб Әмірліктері және Бахрейн аумақтарындағы нысандарға дрондар мен зымырандар арқылы соққы жасағаны хабарланды.