Тоқаевқа тағы бір мүмкіндік беріле ме – саясаттанушы Конституциялық сот шешімі нені аңғартатынын айтты

Президенттің өкілеттік мерзіміне қатысты жаңа конституциялық норманы қолдану тәртібін түсіндірген Конституциялық Соттың шешімі, ең алдымен, саяси элитаға бағытталған. Мұндай пікірді саясаттанушы Марат Шибутов білдірді , деп хабарлайды Politico.kz.

Тарих көрсеткендей, биліктің жақын арада ауысуын күту көбінесе элита ішіндегі ішкі күрес пен саяси белгісіздіктің артуына әкеледі.

«Бүгін Конституциялық Сот Президенттің қайта сайлану мүмкіндігіне қатысты конституциялық норманың қолданылуына байланысты туындаған барлық құқықтық күмәнді жойып, саяси элитаға Президент институтының болашағына қатысты алыпқашпа әңгімелер мен түрлі жорамалдарға жол бермеу жөнінде нақты белгі берді. Қазіргі президенттің сайлауға қайта қатысу құқығының Конституция аясында мүмкін екенінің расталуы саяси тұрақтылықты нығайтатын әрі елдегі ішкі тұрақтылықты қамтамасыз ететін қосымша фактор ретінде қабылдануға тиіс», – деді Марат Шибутов.

Саясаттанушы Конституциялық Соттың шешімі Қасым-Жомарт Тоқаевтың келесі президенттік сайлауға міндетті түрде қатысатынын немесе саяси үдерістің алдын ала айқындалып қойғанын білдірмейтінін атап өтті.

«Әңгіме Конституцияда көзделген құқықтық мүмкіндік туралы ғана болып отыр. Ал бұл мүмкіндіктің жүзеге асуына қатысты түпкілікті шешімді сайлау арқылы Қазақстан азаматтары қабылдайды. Конституциялық Сотқа жолданған өтініштің негізгі мәнін де осы тұрғыдан қарастырған жөн. Бұл – ішкі саяси күштерге Қазақстанның мемлекеттік институттарының орнықтылығын сақтап отырғанын, барлық саяси үдерістердің құқықтық алаңда жүзеге асырылатынын және президенттік билік вертикалінің әлсіреуіне немесе саяси процестерді жасанды түрде жеделдетуге бағытталған қандай да бір есептерге негіз жоқ екенін аңғартатын маңызды саяси сигнал», – деп түсіндірді сарапшы.