Трамп 90 күндік тариф "паузаcын" жариялады

АҚШ Президенті Дональд Трамп әлеуметтік желіде Қытайға қарсы жаңа сауда шараларын жариялады, деп хабарлайды POLITICO.KZ.

Трамптың айтуынша, Қытайдың әлемдік нарықтарға деген құрметсіздігін ескере отырып, АҚШ Қытайдан әкелінетін тауарларға салынатын баж салығын бірден 125%-ға дейін арттырды. Бұл шешім дереу күшіне енеді.

"Қытай бұрынғыдай АҚШ пен өзге елдер есебінен пайда таба алмайды. Бұл заман артта қалды және енді жол берілмейді", – деді Трамп Truth Social желісінде.

Сонымен қатар Трамп АҚШ-тың Сауда министрлігі, Қаржы министрлігі және Сауда өкілдігі (USTR) арқылы 75-тен астам елдің өкілдерімен жүргізілген келіссөздерге назар аударды. Осы елдер АҚШ-қа қарсы қарсы шара қолданбағаны үшін Трамп олар үшін 90 күндік "пауза" енгізіп, өзара баж салығын 10%-ға дейін төмендетуге рұқсат берді. Бұл өзгерістер де дереу күшіне енеді.

Трамптың бұл шешімінен кейін The Financial Times мәліметінше, АҚШ акцияларының бағасы күрт өсті.