Трамп тарифтерді осылай «есептеді»

АҚШ президенті Дональд Трамп жариялаған тарифтік саясаттың есептеу тәсілі халықаралық сарапшылар мен экономистер тарапынан қатты сынға ұшырады, деп хабарлайды POLITICO.KZ Der Spiegel басылымына сілтеме жасап.

Трамптың айтуынша, тарифтер әр елдің АҚШ-қа қоятын кедергілері мен «сауда әділетсіздіктеріне» негізделген. Алайда сәрсенбі күні жарияланған кейбір тарифтер 50%-ға дейін жеткенімен, олардың есептелу әдісі нақты түсіндірілмеген.

Ақ үй жариялаған күрделі формула экспорт пен импорт арасындағы сауда тапшылығына негізделген. Яғни:

• Әр елмен сауда балансының тапшылығы сол елдің АҚШ-қа экспортына бөлінеді;
• Шыққан нәтиже екіге бөлініп, тариф мөлшері ретінде қабылданады.

Мысалы, Трамп Германияның АҚШ-қа көлік сатуының артықшылығын әділетсіздік деп есептейді. Ал экономистер бұл айырмашылықты – бәсекелестік пен өндіріс сапасына байланысты деп түсіндіреді.

Экономист Клаус Михельсен мен журналист Джеймс Шуровьески бұл тәсілді «абсурд», «мәнсіз» деп сипаттады. Шуровьески Оңтүстік Кореямен еркін сауда келісімшарты бола тұра, оған 25% тариф қойылғанын мысал етті.

«Бұл формуланы басқа елдер қолданса, Гибралтарда тариф мөлшері 75 000%-ға дейін жетер еді», – деді Михельсен.

Трамп әкімшілігі бұл сынға назар аудармады. Керісінше, Ақ үй «Трамптың батыл сауда шаралары мақтауға лайық» деген атаумен баспасөз хабарламасын жариялады.