«Үш баланың анасы»: АҚШ-та қазақстандық әйелдің не үшін ұсталғаны белгілі болды

Әлеуметтік желіде қазақстандық әйелді АҚШ-та Иммиграциялық және кедендік бақылау қызметі (ICE) ұстағаны туралы ақпарат тарады, деп хабарлайды Politico.kz.

Қазақстанның сыртқы істер министрлігі бұл мәліметті тексерді.

Бүгін министрлік істің мән-жайын түсіндірді.

«Қазақстан азаматшасын АҚШ-та заңды көші-қон мәртебесінің болмауына байланысты Флорида штатының аумағында АҚШ иммиграция қызметінің қызметкерлері ұстап алған. Қазақстандық дипломаттар қажетті консулдық көмек көрсету мақсатында АҚШ-тың мемлекеттік органдарымен және ұсталған азаматшаның отбасымен байланыс орнатқан», - делінген министрліктің тілшімізге берген жауабында,  

Бұған дейін Instagram желісіндегі salty_sssalt парақшасында қазақстандық әйелдің ұсталғаны туралы алаңдатарлық жазба жарияланған.

«12 қыркүйекте үш баланың анасы болып отырған құрбымызды ICE қызметкерлері қамауға алды», – делінген жазбада.

Алайда жарияланым авторлары әйелдің нақты қандай себеппен ұсталғанын және оның қазіргі жағдайы қандай екенін көрсетпеген.

ICE немен айналысады?

АҚШ-тың Иммиграциялық және кедендік бақылау қызметі (ICE) елдегі иммиграциялық заңнаманың сақталуын қамтамасыз етеді. Сондай-ақ қызмет заңсыз көші-қонға, адамдар мен тауарлардың заңсыз тасымалына қарсы күресіп, терроризмнің алдын алуға бағытталған жұмыстарға қатысады.

ICE АҚШ-тың Ішкі қауіпсіздік министрлігіне қарайды және бірқатар жағдайда АҚШ-тың Кеден және шекараны қорғау қызметімен (CBP) бірлесіп жұмыс істейді.