«Яндекс» қашан жұмыс істейді? Министр жауап берді

Қазақстанда «Яндекс» сервистерінің жұмысы 2-3 күн ішінде толық қалпына келуі мүмкін. Бұл туралы 12 қазанда Премьер-министрдің орынбасары, жасанды интеллект және цифрлық даму министрі Жаслан Мәдиев мәлімдеді, деп хабарлайды Politico.kz.

Zakon.kz мәліметінше, Ақордада журналистер министрден «Яндекс» сервистеріндегі ақаулар туралы сұрады. Олар такси шақыру және жеткізу қызметтеріне арналған отандық платформа әзірлеу мүмкіндігін де көтерді.

«Яндекс» жұмыс істеп тұр. Компания платформаның жұмысын тұрақтандыруға кірісті. 2-3 күн ішінде барлық сервис толық жұмыс істейді деп үміттенеміз», деді Жаслан Мәдиев.

Бұған дейін Жасанды интеллект және цифрлық даму министрлігі қазақстандық пайдаланушылардың жеке деректері сақталған «Яндекс» серверлері қалыпты жұмыс істеп тұрғанын хабарлаған.

Ал «Яндекс Go» компаниясы сервистерінде ақау барын, кейбір қызметтер уақытша қолжетімсіз болуы мүмкін екенін мәлімдеген. Компания пайдаланушылардан, жүргізушілер мен курьерлерден қолайсыздық үшін кешірім сұрады.

Компанияның түсіндіруінше, ақауға деректерді өңдеу орталықтарының зақымдануы себеп болған. Қазір инженерлер алдымен ең көп қолданылатын сервистердің жұмысын қалпына келтіріп жатыр.

Компания барлық өңірде сервистердің жұмысын мүмкіндігінше тезірек толық қалпына келтіруге күш салып жатқанын жеткізді.