2025 Қазақстанда қандай ипотекалар бар: толық шолу

«Ипотека-2025»: Қазақстандағы қолданыстағы ипотекалық бағдарламалардың шарттары мен ерекшеліктері

№1. «7–20–25»: тек жаңа тұрғын үйге арналған бағдарлама

Бұл – тек бастапқы тұрғын үй нарығына арналған әлеуметтік бағдарлама. Яғни, бағдарлама арқылы тек жаңа үй сатып алуға болады.

Ипотеканың пайыздық мөлшерлемесі – 7% (ЖТСМ – 7,2%).

Бастапқы жарна – тұрғын үй құнының 20%-ынан басталады.

Максималды тұрғын үй құны:

• Астана, Алматы, олардың маңайы, Ақтау, Атырау, Шымкент – 25 млн теңге;
• Қарағанды және Түркістан – 20 млн теңге;
• өзге өңірлер – 15 млн теңге.

Несиені өтеу мерзімі – 25 жылға дейін.

Қарыз беру және қызмет көрсету үшін комиссия алынбайды. Кепіл мүлкін және қарыз алушының өмірін сақтандыру міндетті емес. Ипотекалық несиені мерзімінен бұрын өтеуге тыйым салынбайды және айыппұлдар қарастырылмаған.

Кімдер ала алады?

Тұрақты табысы бар, соңғы 18 айда жеке тұрғын үйі болмаған, бұл бағдарламаға бұрын қатыспаған және өзге ипотекасы жоқ жұмыс істейтін азаматтар. Аталған бағдарлама бойынша несие беретін банктер қосымша талаптар қоя алады, бірақ олар бағдарламаның негізгі шарттарына қайшы келмеуі тиіс.

Бағдарлама операторы – «Қазақстан тұрақтылық қоры» АҚ.

№2. «Орда Аймақ»: үлескерлерге арналған бағдарлама

«Орда Аймақ» – «Қазақстан тұрғын үй компаниясының» тұрғын үй құрылысына кепілдік берілетін жобалар бойынша берілетін ипотекалық бағдарламасы. Егер құрылысқа қатысты қиындықтар туындаса, жобаны аяқтау жауапкершілігін компания өз мойнына алады.

Ипотека мөлшерлемесі – 15,9% (ЖТСМ – 17,26–22,81%).

Бастапқы жарна – тұрғын үй құнының 20%.

Несие сомасы – 1 млн-нан 75 млн теңгеге дейін.

Мерзімі – 1 жылдан 20 жылға дейін.

Кімдер ала алады?

21 жастан асқан азаматтар. «Отбасы банк» депозиті немесе бағалау көрсеткіші талап етілмейді. Соңғы 5 жылда жеке тұрғын үй болмауы шарты жоқ. Алайда кепілге қойылатын мүлік қажет – жеке үй немесе жер телімі бар пәтер. Жеңіл құрылымды үйлер (каркас, саман және т.б.) кепілге алынбайды.

№3. «Тұрғын үй заемы»: 3 жыл бойы жинақтауды талап ететін бағдарлама

Бұл бағдарламаға қатысу үшін келесі үш шартты орындау қажет:

• кемінде үш жыл жинақтау;
• «Отбасы банк» салым шотында келісім сомасының 50%-ын жинау;
• бағалау көрсеткіші 16-ға жетуі тиіс.

Ипотека мөлшерлемесі – 3,5%-дан бастап (ЖТСМ 3,6–4,4%) 5%-ға дейін (ЖТСМ 5,1–6,9%).

Бастапқы жарна – 50%.

Максималды сома – 100 млн теңгеге дейін.

Мерзімі – 6 айдан 25 жылға дейін.

Кімдер ала алады?

«Отбасы банктің» барлық салымшылары, үш жыл бойы тұрғын үй құнының кемінде 50%-ын жинаған және бағалау көрсеткіші 16-ға жеткен жағдайда.

Бағалау көрсеткіші – клиенттің қаржылық тәртіп көрсеткіші. Егер салымды ай сайын үзбей толықтырып отырса, бұл көрсеткіш артады. Банк жыл сайын 2% сыйақы (ЖТСМ – 2,4–14%) және мемлекеттен 20% көлемінде сыйақы (200 АЕК шегінде) қосымша береді. Сатып алынған мүлік кепілге қойылады.

№4. «Өз үйім»: тек жаңа құрылысқа арналған бағдарлама

Бұл – «Отбасы банкінің» өзінің бағдарламасы. Тек келісімшарт жасасқан құрылыс компанияларынан пәтер сатып алуға болады. Қаласаңыз, жөндеу шығындарын да несие сомасына қосуға болады.

Бағдарламада екі нұсқа бар – 50/50 және 30/70.

50/50 нұсқасы:

• Ставка – 6% бастап (ЖТСМ – 6,2–6,3%);
• Бастапқы жарна – 50%;
• Максималды сома – 100 млн теңге;
• Мерзімі – 25 жылға дейін.

30/70 нұсқасы:

• Ставка – 7% (ЖТСМ – 7,3–9%);
• Бастапқы жарна – 30%;
• Максималды сома – 100 млн теңге;
• Мерзімі – 25 жылға дейін.

30% бастапқы жарна жеткілікті, ал қалған 20% құрылыс салушы есебінен жабылады. Бұл үшін алдымен 20% көлеміндегі бірінші несие алынып, ол клиенттің депозитіне аударылады. Сол депозит бойынша екінші несие рәсімделеді.

Несие рәсімделуі былайша бөлінеді:

1. Бірінші несие – тұрғын үй құнының 20%. Оның 10% құрылыс компаниясы клиенттің депозитіне салып береді.
2. Екінші несие – пәтер сатып алу үшін беріледі. Бастапқы жарна – 50% (30% клиенттің қаражаты және 20% бірінші несиеден түседі).

Кімдер ала алады?

«Отбасы банкте» кемінде 500 мың теңге жинаған кез келген азамат. Жылжымайтын мүлік санына, тіркеуге қатысты шектеу жоқ. Мысалы, Шымкентте тұрып, Астанадан үй сатып алуға болады. Бағдарлама қатысушыларына салықтық жеңілдіктер қарастырылған және құрылысы жүріп жатқан үйді үлестік қатысу арқылы сатып алуға болады.

№5. Аралық тұрғын үй займы

Бұл несие «Отбасы банкте» үш жыл жинамаған, бірақ депозитінде тұрғын үй құнының 50%-ы жиналған клиенттерге арналған.

Бағалау көрсеткіші кем дегенде 5 болуы тиіс. Мысалы, бірден барлық 50%-ды депозитке салып, алты ай күту арқылы осы көрсеткішке жетуге болады.

Ипотека ставкасы – 6%-дан (ЖТСМ 6,2–6,3%) 8,5%-ға дейін (ЖТСМ 9–9,6%), кейін ол 3,5%-ға дейін (ЖТСМ 3,6–4,4%) төмендейді.

Бастапқы жарна – 50%.

Максималды сома – 100 млн теңге.

Мерзімі – 6 айдан 25 жылға дейін.

Клиенттің 50% салымы кепіл ретінде қабылданады. Бұл салымға банк сыйақысы және мемлекет сыйақысы қосылады.

Аралық несие мына бағдарламалар аясында қолжетімді:

• «Өз үйім»;
• «Нұрлы жер»;
• қайталама нарықтағы тұрғын үй сатып алу несиелері.

№6. Жасыл ипотека

Бұл – экологиялық стандарттарға (ӨМІР / ГОСТ Р / BREAM / LEED) сай келетін жаңа тұрғын үйді сатып алу немесе жөндеу үшін берілетін несие.

Ставка:

• 12,5% (ЖТСМ – 13,3–18,1%);
• мүгедектігі бар тұлғалар үшін – 7% (ЖТСМ – 7,3–8,4%).

Егер үй «алтын» деңгейінен төмен емес сертификат алса:

• жергілікті атқарушы органдар кезегінде тұрғандар үшін – 7% (ЖТСМ – 7,3–8,4%);
• тұрғын үй төлемін алушылар үшін – 11% (ЖТСМ – 12,1–15%).

Бастапқы жарна:

• 20–50%;
• тұрғын үй төлемін алушылар үшін – 15–50%.

Максималды сома – 50 млн теңгеге дейін.

Мерзімі – 6 айдан 25 жылға дейін.

Егер заем сомасының 50%-ы жиналса, пайыздық мөлшерлеме 3,5%-ға дейін (ЖТСМ – 3,6–4,4%) төмендейді.

«Отбасы банк» баспасөз қызметінің мәліметінше, бұл бағдарлама аясындағы қаржыландыру алдағы айларда басталады.

Ақпарат informburo.kz сайтынан алынған.