Адвокат клиентіне пара алуға итермелеп, өзі түрмеге түсті

Қарағанды соты адвокат Рашид Ефизовтің жазасын күшейтіп, оны үш жылға бас бостандығынан айырды, деп хабарлайды POLITICO.KZ, ORDA арнасына сілтеме жасап.

Бұған дейін ол алаяқтық және пара беруге итермелеу бойынша кінәлі деп танылып, екі жарым жылдан астам мерзімге шартты түрде сотталған еді. Алайда апелляциялық сот оның жазасын күшейту туралы шешім шығарды.

Рашид Ефизов – Қарағанды облыстық адвокаттар алқасының мүшесі, ол бұрын Қарағанды полиция департаментінің тергеу басқармасының бастығы Рустам Күлкеевтің қорғаушысы болған. Күлкеев криптовалюта өндірісіне арналған жабдықтарды ұрлады деген күдікке ілінген. Алайда кейінірек адвокаттың өзі басқа қылмысқа қатысты тергеліп, клиентін ауыстыруға мәжбүр болды.

Ефизов балабақша директрисасына оны қамаудан құтқарамын деп, 4 миллион теңге пара беруге көндірген. Бірақ әйел бұл жағдайды ҰҚК-ге хабарлап, арнайы операция ұйымдастырылды. Адвокат әйелден ақшаны алған сәтте ұсталды. Тергеу барысында оның бұл соманы ешқандай тергеушіге беруді жоспарламағаны анықталды.

Алғашқы сотта оған екі жыл алты ай бас бостандығын шектеу жазасы тағайындалған. Алайда кейін белгілі болғандай, істі қараған судья бұған дейін Ефизовпен бірге полицияда жұмыс істеген. Прокуратура бұл үкімге қарсы шығып, жазаны күшейтуді талап етті.

Апелляциялық сот адвокаттың жазасын үш жылға қатаңдатып, оны колонияға жіберді. Сондай-ақ, оған өмір бойына мемлекеттік қызметте, сот жүйесінде және квазимемлекеттік секторда жұмыс істеуге тыйым салынды.