Алматыда ҚазҰУ оқытушысын әріптестері жарақаттаған

Желіде әл-Фараби атындағы Қазақ ұлттық университетінде әйелге шабуыл жасалғанын көрсететін видео жарияланды, деп хабарлады politico.kz Stan.kz-ке сілтеме жасап. Оқиға 2 тамызда болған. Видеодағы әйел өзінің сот шешімімен жұмысқа қайта алынғанын, жылдық демалысы туралы ақпарат алу үшін университетке келгенін айтады. Оқытушы Гауһар Дүйсембиева 16 маусымнан бері заңды еңбек демалысына шыға алмай жүргенін алға тартты. Ол кафедра меңгерушісіне хабарласқан. Артынан университет қызметкерлері әйелге шабуыл жасап, телефонын тартып алып, дене жарақатын салған көрінеді. Видеода әйел шабуылдың салдарынан зардап шеккенін айтып, көгерген жерлер мен жарақаттарын көрсетті. Ол өзінің әр қадамын видеоға түсіруге мәжбүр болғанын айтты. Алматы қалалық полиция департаментінің баспасөз қызметі қазір оқиғаға қатысты тергеу жүріп жатқанын растады.

Бостандық аудандық полиция бөлімі жарақаттың ауырлығын анықтау үшін сот-медициналық сараптама тағайындады. Істің мән-жайы анықталып жатыр, – деді полиция өкілдері.

Университет өкілдері де оқиғаға қатысты түсінік берді.

Оқиға 2024 жылдың 2 тамызында Дүйсембиеваның және басқа да профессорлық-оқытушылар құрамының қатысуымен университетте болған. Аталған факті Дүйсембиеваның арызы бойынша Бостандық ауданының полиция бөлімінде тіркелгенін хабарлаймыз. Қазір полиция қызметкерлері тергеу амалдарын жүргізіп жатыр. Соңғы процессуалдық шешім қабылданған жоқ, – деп хабарлады университеттің баспасөз қызметі.

Ведомствоның хабарлауынша, Гауһар Дүйсембиева 2022 жылдың 1 қыркүйегінен бастап қазіргі уақытқа дейін оқытушы болып қызмет атқарған.

2022-2023 оқу жылында орыс филологиясы кафедрасында 1,5 ставка бойынша мұғалім болды. Ал 2023 жылдың қыркүйегінен бастап ҚазҰУ-дың мамандандырылған мектебінде оқытушы қызметін атқарды. Осылайша, Дүйсембиева соңғы екі оқу жылында ҚазҰУ-да үздіксіз жұмыс істеп келген. Ал 2024 жылдың шілдесінде, 10 айдан аса уақыт өткен соң Дүйсембиева ҚазҰУ-дың қазіргі оқытушысы бола тұра, сол университеттің орыс филологиясы кафедрасының оқытушысы қызметіне қайта оралу туралы негізсіз азаматтық іс қозғады. Бостандық аудандық соты 2024 жылғы 15 шілдеде Дүйсембиеваның талап арызын қанағаттандырды, – делінген ақпаратта.

Сот шешімі қазір Алматы қаласының жоғары сотында апелляциялық тәртіпте қаралып жатыр.

Азаматтық іс жүргізу кодексінің жұмысқа қалпына келтіру туралы сот шешімін дереу орындау қажеттігі туралы талабына байланысты университет Дүйсембиеваны 2024 жылғы 15 шілдеде орыс филологиясы кафедрасына өтемақы төлей отырып, оқытушы қызметіне қалпына келтіруге мәжбүр етті. Дүйсембиеваның пайдасына 855 мың теңге жалақы өндірілді. Негізсіз сот актісі нәтижесінде Гауһар қазір Еңбек кодексінің нормаларын бұза отырып, ҚазҰУ-де екі лауазымда оқытушы болып жұмыс істеп, бір заңды тұлғада 2,68 лауазымды атқарып отыр. 2024 жылдың 5 шілдесі мен 31 тамызы аралығында мамандандырылған мектепте оқытушының негізгі қызметі бойынша жыл сайынғы еңбек демалысында және Еңбек кодексінің 92-бабын бұза отырып, екінші лауазымына демалыс беруді талап еткен, – деп қорытындылады университет өкілдері.