Алматылық курьер подъезде тұрған балалар арбасына дәрет сындырып кеткен

Алматыда курьер балалар арбасына дәрет сындырып кеткен, деп хабарлайды Politico.kz.

Жергілікті тұрғынның айтуынша, курьер тапсырысты орындау кезінде подъезд дәлізінде тұрған балалар арбасына әдейі дәрет сындырып кеткен.

Баласының арбасы бүлінген әйелдің айтуынша, оқиға демалыс күні кешке болған. Әуеліде ол арбаның дымқыл болып тұрғанын көріп, «балалар су төгіп алған шығар» деп ойлаған. 

Бірақ жағымсыз иіс пен сарғыш дақтан күдіктенген әйел бақылау камераларын тексерткен.

Бейнежазбадан көрші пәтерге тапсырыс әкелген курьердің арбаға әдейі дәрет сындырғаны көрінген.

Қазіргі уақытта Алмалы аудандық полиция басқармасы тарапынан тексеру жүргізілуде.

«Бұл адамның кім екені анықталды.  Полиция қызметкерлері оның орналасқан жерін анықтау және ұстау бойынша жедел-іздестіру іс-шараларын жүргізуде», - дейді Алматы қалалық полиция департаменті.