АҚШ соты Қытайды COVID-19 туралы ақпаратты жасырды деп айыптап, 24 миллиард доллар талап етті

АҚШ-тың Миссури штатындағы федералдық сот Қытай үкіметін COVID-19 туралы ақпаратты жасырды және әлемді адастырды деп айыптап, 24 миллиард доллар көлемінде өтемақы талап етті, деп хабарлайды POLITICO.KZ The New York Times басылымына сілтеме жасап.

Бұл іс 2020 жылы басталып, сол кездегі Миссури Бас прокуроры Эрик Шмитттің бастамасымен сотқа берілген. Айыптауға сәйкес, Қытай пандемияның алғашқы кезеңдерінде вирус таралуының нақты ауқымын жасырды, медициналық қорғаныс құралдарының өндірісін шектеді және экспортына тосқауыл қойды.

Сот шешімінде судья Стивен Лимбо "Қытай әлемді адастырып, медициналық қорғаныс құралдары өндірісінде монополия құрды" деп мәлімдеді. Осыған байланысты, сот Қытайдың АҚШ-тағы активтерін тәркілеу арқылы шығынды өтеуге шешім шығарды.

Алайда, Қытай билігі бұл шешіммен келіспейтінін мәлімдеді. Вашингтондағы Қытай елшілігінің өкілі Лю Пэнъюй "Бұл талап ешқандай құқықтық немесе фактілік негізге ие емес" деп, Бейжіңнің өз мүддесін қорғау үшін қарсы шаралар қабылдайтынын айтты.

Қытай мен АҚШ арасындағы қарым-қатынастар соңғы жылдары шиеленісе түскенін ескерсек, бұл сот шешімі екі ел арасындағы жаңа дипломатиялық қақтығыстарға алып келуі мүмкін.