Астанада екі оқушы қыздың өліміне қатысты жаңа деректер шықты

Астанада көпқабатты үйдің биігінен құлап қаза тапқан екі жасөспірім қызға қатысты жаңа мәліметтер белгілі болды. Бейнебақылау камералары қайғылы оқиғаға дейін олардың тұрғын үйдің кіреберісіне кіріп, 13-қабатқа көтерілгенін түсіріп алған, деп хабарлайды Politico.kz Azattyq ryhy-на сілтеме жасап.

Қайғылы жағдай 9 қараша күні кешке елордадағы тұрғын үй кешендерінің бірінде орын алған. Үй тұрғындарының айтуынша, қаза тапқан қыздардың жасы шамамен 13-те. Олардың бірі осы үйде әжесімен бірге тұрған, ал ата-анасы шетелде болуы мүмкін деген болжам бар.

Мүлік иелерінің бірлестігінің (МИБ) төрайымы Ләйла Кенжебаева бейнебақылау камераларын қарап шығып, қыздардың кіреберіске кіргенде көңілсіз болғанын айтты:

«Лифтідегі камералардан екі қыздың 13-қабатқа көтерілгенін көрдік. Содан кейін олар ортақ балконға кірген. Олардың бірінің қолында қағазға жазылған жазба болды», — деді ол.

Мектеп оқушылары ортақ балконда шамамен бір жарым сағаттай болып, сағат 18:40 шамасында қайғылы жағдай орын алған.

МИБ төрайымы оқушылардың психологиялық қысымға немесе мектепте буллингке тап болуы мүмкін екенін болжап отыр:

«Менің ойымша, бұл жайдан-жай болған жоқ. Қыздарды осындай шарасыз қадамға баруға итермелеген қандай да бір жағдайлар болған шығар. Полиция мен барлық құзырлы орган мән-жайды анықтап, себебін анықтауы керек. Мүмкін, мектепте қандай да бір қиындықтар болған шығар, біреу ренжіткен болуы мүмкін», — деп атап өтті Кенжебаева.

Астана қалалық Полиция департаменті кәмелетке толмағандардың өлімі фактісі бойынша қылмыстық іс қозғап, тергеу амалдарын бастады. Тергеу мүддесіне байланысты өзге ақпарат жария етілмейді.