Астанада мектеп гардеробындағы оқиғадан кейін директор қызметінен кетті (ВИДЕО)

Астанадағы №99 мектепте сабақтан кейін оқушылардың жаппай киім ілетін бөлмеге баруынан кептеліс пайда болып, олар бір-бірін таптап кете жаздады. Оқиғаға екінші ауысымдағы сабақ кестесінің дұрыс құрылмауы себеп болған, деп хабарлайды Politico.kz.

Астана қаласының білім басқармасы мәліметінше, екінші ауысымда бірден жеті сыныптың сабағы бір уақытта аяқталған. Соның салдарынан оқушылар сырт киімдерін алу үшін гардеробқа бір мезетте барған.

Оқиғадан кейін мектеп гардеробшысы жұмыстан босатылған. Сонымен қатар мектеп директоры да қызметінен кеткен.

«Әлеуметтік желіде оқушылардың бірі гардеробта есінен танып қалғаны туралы ақпарат тараған. Алайда бейнебақылау камераларындағы жазбаларды тексеру кезінде бұл мәлімет расталмаған», - дейді білім басқармасындағылар.

Енді мектеп әкімшілігі гардероб маңындағы тәртіпті бақылауды күшейтеді. Атап айтқанда, оқушылардың жаппай жиналып қалмауы үшін білім беру ұйымының қызметкерлері қосымша кезекшілік атқарады.